Kira Kiralina

di *nevue fun shvartsaplen 10: Kira Kiralina

dos fargangene hot farblondzhet in di morgns.
lomikh hern vos es hot tsu dertseyln:
di yorn loyfn gikher fun di teg.
nor ot blaybn zey a vaylitshke baym zoym fun an opgrunt ikh zol farvarfn iber zey a fliendike shtrik un zey tsuriktsien eyder s'vert shpet, eyder mayne blikn vern tseshplitert mit zey tsuzamen.
mayn fliendike shtrik lozt zey nit arunterfaln.
ikh hob a paynlekhe *hanoe ibertsulebn dos gelebte.
ir nomen iz Kira Kiralina.
vi s'iz ir *emesdiker nomen veys *mistome atsind keyner nit.
oyf der hengendiker *matseyve fun krematorye-roykh iz oykh azoy oysgekritst ir nomen.
oyb s'iz faran a toyter vos gedenkt ir *emesdikn meydl-nomen - zol er mir onklapn in di shleyfn!
*almay heyst zi Kira Kiralina?
in der skoytn-organizatsye tsu velkher mir beyde gehern, hot zi di same ershte geleyent dem roman fun Panait Istrati un hert nit oyf zikh oystsufaynen mit ir geleyentshaft un mit ir libe tsum held fun roman: Kira Kiralina.
iz aza geblibn ir nomen.
zi iz di feferdikste meydl nit bloyz in mayn krayz aleyn.
s'iz nit iber dem vos ir tate Meyrem fun troker-gas iz a *fefer-soykher.
volt er gehaltn a kreml fun di gemeynste hering, volt zayn tokhter oykh gehat a honikdikn *tam.
zi iz din-geshlifn, beygevdik un vintish, vi der shlanker aroyfgeshnitener ayer-groz fun der griner ozere.
meydlekh shushken zikh, az dem *fefer-soykhers tokhter shtamt fun a *shiksldikn *yikhes. ober s'iz fun *kine vegn, vos a *malekh hot *al-pi-toes (er hot gemeynt s'iz a yingl) ir a shnel geton in ir nezl *beys der geboyrnshaft.
ir nezl iz geblibn *shiksldik farrisn un makht *meshuge di yinglekh.
mikh manyet nit ir nezl.
zol zikh es nezlen gezunterheyt.
oykh ir kapoyerdiker shmeykhl, vos heybt zikh on fun di fisfinger un khvalyet zikh aroyf bizn roythorikn kop un tseshtralt zikh in di pasmes hor, iz *mekhutsn reyts-magnet ikh zol tsu ir nenter tsushvimen *beysn bodn zikh.
*efsher shtamt es bay mir fun ir barimen zikh, az ale yinglekh zenen far ir di *kapore un zi hot lib: keynem nit.
mayn glaykhgilt tsu Kira Kiralina vert ober *sakonesdiker.
er vert farvandlt in a *min lokerdiker fayndshaft.
ikh vil fun ir antloyfn, ober ikh hob nit tsu vemen. ikh vil antloyfn fun zikh aleyn - hob ikh oykh nit tsu vemen.
un ot geshet a misteryeze avanture:
*beys eyner a skoytn-vanderung in di mon-shpurn fun letste zumerteg, dervandern mir in ovnt tsum taykh Zemyane.
mir bashlisn ibertsunekhtikn oyfn barg vos baym bortn fun taykh in a vald fun yung-un-alte sosnes.
bobedike shotns hoykern zikh tsvishn di beymer un klaybn yagdes mittsugebn dem zunfargang.
der zunfargang hot lib horik royte malines.
vi der shteyger, tseleygt men opgetriknte tsvaygn far a shayter.
der flemldiker ek fun zunfargang tsindt im unter.
di nakht farblaybt mit undz in vald.
zilbern vaser-geplyesk in der erds ofene odern.
tsupndiker *smole-reyekh filt on mayne glider.
der shayter shpringt arunter fun barg in der Zemyane arayn.
di naketkayt fun shayter iz oykh ongeton in a kapoyerdikn shmeykhl fun di fisfinger bizn roytn kop un pasmes hor.
der shayter bodt zikh in der Zemyane un vert nit farloshn.
yeder mentsh iz a retenish, vos beser az me basheydt nit. *afile a yingl.
yemolt un plutsem brumt emets aroys fun mir durkh a horn:
- Kira Kiralina, loz iber di yinglekh un kum aher.
ikh vel dikh aynshlefern.
a borvese, ober on di borvese kuntsn, vi s'heyst bay undz meydlshe koketerye, kumt zi un blaybt zitsn oyfn toyikn groz mir antkegn. ire fun shayter baloykhtene royte hor zenen tseshoybert.
an ekdish derlangt in mir a shtokh dem horn-brumer.
s'tut in mir *moyredik vey - an andern.
a banumener fun dem anderns *koyekh shnayd ikh zi durkh mit bistre blikn:
- zog, paskudne moyd, vemen hostu lib oyf an *emesn?
keyner zet nit, hert nit tsi Kira Kiralina lakht oder veynt.
ir *ponim iz farshleyert mit ire tseshoyberte royte hor.
- zog, ikh bafel!
- ye... ikh hob lib...
- tsum ershtn mol, tsum tsveytn mol, tsum dritn: vemen? der nomen zayner!
- Kira Kiralina... - un zi blaybt lign ayngeshlefert in groz.
me veys nit: zi makht zikh oder neyn.
iz es nit eyner fun ire borvese kuntsn?
me treyslt zi, me patsht ire beklekh - zi shloft; me gist zi op mit kalt vaser - zi shloft; *afile di *levone iz naygerik un pruvt mit a finger ir efenen an oyg - zi shloft; ikh nem zi kayklen in kropeve, dortn vu di bobedike shotns hobn frier geklibn malines un kaykl zi shier nit arunter fun barg in der Zemyane arayn, vu se bodt zikh nokh der naketer shayter - zi shloft.
un der horn-brumer in mayn ingeveyd, vos hot zi frier ayngeshlefert, ken zi nit oyfshlefern.
on otem loyf ikh mit nokh vemen in a dorf tsu a dokter.
nito keyn dokter. bloyz a znakher.
mir muzn im trogn oyf di hent, azoy alt iz er.
der znakher blozt ir in moyl arayn dem krey fun a hon.
ersht yemolt efnt zi ire umshuldike oygn.

  1986

tsurik:  di *nevue fun shvartsaplen