soldatske shtivl

di *nevue fun shvartsaplen 18: soldatske shtivl

mir, dayne fis, hobn oykh epes tsu dertseyln.
zenen hent bilkher vayl zey haltn a pen oder a meser?
vayl zey tsertlen un dershtikn?
mir hobn oykh finger un zey tuen keynem keyn *roe nit.
in keyn *shum haldz hobn zey nit oysgepruvt zeyere negl.
dayn rekhte hant vet undz nit onyogn oyb mir'n dertseyln khotshbi a toyzntstl fun dayne *soydes.
nor bashert iz undz dir knekhtish tsu badinen.
host undz zeltn dermont tsum gutn.
ober me veys nokh nit vemes ayngebisene shpurn veln lebn lenger: di hentike tsi di fisike.
veystu az fis *kholemen? az fis benken? az fis tuen *tfile?

in yenem vinter iz der shney nit geven keyn shney, nor a kalkhoyvn geheytst fun a frostiker *sreyfe.
umbashitst un borvese, vayl in *mehumediker aylenish, hostu nit bavizn aroyftsuton oyf undz dayne shtivl, zenen mir beyde, beyde fis di tsviling-brider, antrunen fun di pastkes un fangnetsn vos der *soyne hot tseshtelt un tseshpreyt iber der gegnt.
mir zenen gelofn dorf-ayn, dorf-oys - nit vi untergeshosene, nor *beemes untergeshosene.
vu nit vu hot zikh der shney unter undz ongevaremt un tsegangen in trern.
s'iz ober geven a dakhtenish.
undz iz fintster gevorn bizn dno fun *meshugas: veln mir bald nit bashukht oder bashtivlt vern, vet aynfrirn in undz dos royte kvelkhl un dayn otem vet nit kenen oyfblozn undzere letste funken.
oy! mir hobn *mekane geven dem volf unter di shtern, vos darf nit keyn ontuekhts oyf zayne lapes.
der hunger nokh an otem varemkayt iz geven shtarker vi der hunger in dayn ingeveyd.
undzer *tfile iz ober farnumen gevorn:
in eyner a nakht, ven di shtilkayt hot zikh geboygn untern krekhts fun a volf, hobn mir zikh arayngeshart in a shtal fun a farshneytn khuter.
di tir iz nit geven tsugeshlosn oyf a keyt.
a ferd iz geshlofn shteyendikerheyt in a *levone-kroyn.
vorhaftik. mir hobn keyn mol nit gezen keyn oygn fun a *malekh.
du oykh nit. nor az der ferd hot geefnt zayne *rakhmimdike oygn, hot zikh gedakht: zey zenen *malokhishe.
un der ferd, nit andersh er hot gevart oyf undz, hot aruntergeboygn zayn bakroyntn kop un mit zayn ziser varemer pare funandergelozn un funandergeyogt in undzere odern dos royte kvelkhl.
un az der kayor hot arayngezetst a hak in a belke funem shtal, ineveynik, hostu yemolt shoyn aleyn derzen, az di fodershte fis funem gezalbtn ferd zenen ongeton in soldatske shtivl.
un der ferd hot oysgeshtrekt eyn fus un dem andern un du host zey fun im aropgetsoygn un di shtivl zenen geven akurat oyf undzer mos.
yemolt, har undzerer, hobn mir beyde dir geholfn zikh aroyfheybn oyfn gezalbtn ferd un du host *mazldik oyf im avekgeritn un du haltst nokh oyf im in raytn bizn hayntikn tog.

  1987