15: honik fun a vilder bin

griner akvaryum 15:  Honik fun a vilder bin

Aza vet shoyn blaybn di nakht: an alte, a farzesene biz in groen tsop arayn.
Di *levone, vos hot ale ire noente ibergelozn oyf der erd un keynem zet zi nit, zogt *vide oyf ir mirmlnem toytnbet far der eyntsiker bashefenish in shtot, dem *kabren Leyme, vos kortshet zikh untn, oyf Rudnitsker gas, in a kupe ziftsndike bleter.
Leyme, vos zint er gedenkt zayn *ponim, iz er a *kabren, er, vos hot farzeyt mit mentshnkinder a halbn *bes-almen, vet shoyn mer keynem nit *mekaber zayn.
Kinder, *zkeynim, ale do gebirtike, ale zenen arayn in *malkhes fun di shtern. tsu ersht - gevorn flamendike shaytn. Beynerne vintn, in tseflikte hemder mit *mogn-doveds, hobn tsetrogn un tsehangn ibern sharbn fun der velt zeyere funken in a blutiker kroyn.
Farshemt zayn *bes-almen.
Farshemt di *matseyves.
Deriber zinken zey mit geboygene kep, *elehey baleydikte *mekhutonim, ven di *kale iz farshvundn fun unter der *khupe.
Farshemt iz Leyme.
- Ridl, vu bistu, me darf *mekaber zayn di *levone...
Atsind zet er di *levone mit zayn glezern oyg. Oyf dem andern hengt a shlos. Der zilberner shlisl iz nit mer oyf der-velt. A mol, a halbn yorhundert tsurik, hot im a vilde bin oysgeshtokhn dos linke oyg.
Di *mayse mit der vilder bin iz farshribn in a *pinkes:

In a sheynem zumertog, ven Leyme hot aropgelozn a *mes in *keyver, iz mitgefloygn in grub dem *bar-menens *neshome farshtelt in a vilder bin.
Badarft aynroymen a *sod eyder me gezegnt zikh oyf eybik.

Leyme, a proster *khay-vekayem, hot nit banumen di shpileray fun gayster. Im iz nit gefeln der gantser kunkl-munkl, un er hot a zets geton di bin mit zayn leymiker lopete.

Di bin hot aroysgelozn a kinderish geveyn. Ir geshlifn, zunik *peniml hot bakumen dem onblik funem toytn. Eyn minutkele shpeter hot men derhert a kvitsh. Leyme hot zikh gekhapt farn linkn oyg, vu di vilde bin iz arayn vi in a binshtok; un dos oyg iz bald oysgerunen in a roytn zhipendikn vaks unter dem *kabrens horiker lape.

shtot iz demolt gegangen oyf redlekh. Zayn *kabrenshaft iz geshtanen in kon. M'hot im nit tsugelozn tsu a *khoshevern *mes. Nor Leyme hot nit nokhgegebn un di "redlekh" zenen gevorn shtil. A doktor mitn nomen Tsirulnik hot im arayngeshtelt a glezern oyg, azoy blo un *kimat azoy groys vi a hinersher pupik. Un tsuzamen mit di grudes erd oyf dem zaretsher *bes-almen hot Leyme bagrobn di *mayse vegn der bin.

  *

vintn, vi kets baym porn zikh, myauken im tsukopns.
Nito keyn *goyel. Di *meysim zenen vayt. Zol im eyner tsutrogn a kendl vaser...
- Ey, ridl, vu bistu, me darf *mekaber zayn di *levone! Nor zayn ridl, zayn *bes-almendike vayb, kon er nit ontapn.
sha. Ot vandert zayn ridl iber im. vandert aleyn tsvishn hengendike funken. Er grobt, zayn ridl, dem klingendikn *eyn-sof.
Leyme tsit oys a lange hant tsu der *levone. Leygt tsu a shtern tsu ire nozlekher.

Dos zilberne federl git zikh nit keyn tsapl...

Demolt - ikh hob aleyn gezen - iz di vilde bin aroysgefloygn fun zayn glezern oyg un arayngeshtokhn in mayn harts ir letstn fayerdikn honik.

tsurik: *Avrom Sutskever