mayses far yidishe kinder I-7: dos porfolk

a *mayse noyre, vi azoy me hot eyn mol in mitn nakht oyfgekhapt tsvey umshuldike *nefoshes, gebundn, aroysgefirt oyfn mark un farkoyft tsu vilde mentshn, gehodevet a *khoydesh nokhanand mit *madaney-meylekh, un a tog far *Peysekh gekoylet vi di shof.

geshribn in yor 1909.

dos porfolk

funem farfaser.

der *mekhaber fun der geshikhte bet zikh baym lezer, er zol in der *mayse nisht zukhn keyn alegoryes, nisht veln trefn, vemen der *mekhaber hot do gemeynt. es iz do nisht faran keyn *remez fun alegoryes, un *afile nisht, ir zolt zogn, far a groshn ot dos, vos vert ongerufn simbolizm. dos iz glat azoy zikh a *poshete *mayse, on *khokhmes, on eyberkeplekh, a *mayse fun tsvey umshuldike gots bashefenishn nebekh, vos hobn gelebt, gelibt, *gekholemt, gelitn, gehoft un merderish gefaln um *erev *Peysekh, nisht tsu visn far vos un far ven...

Nervi (Italye)

*A[lef]
di shreklekhe nakht

dos iz geven in eyne fun di fintstere, blotike, *farpeysekhdike nekht.
alts iz geven ayngehilt in fintsternish. alts iz geshlofn. shtil un ruik iz geven arum un arum *afile a fish in vaser hot gerut, *moyre gehat aroysshteln dem kop oyf gots velt in der doziker fintsterer, shtiler, ruiker nakht. in aza nakht iz faran a *sakh arbet farn *bal-khaloymes. er zhalevet nisht keyn farbn, shit mit der fuler hant fantazyes, vos nisht geshtoygn, nisht gefloygn, un firt tsunoyf a vant mit a vant. di *khaloymes, vos der held fun der doziker geshikhte hot gezen in yener nakht, zenen geven *meshune-modne vilde *khaloymes! a gantse nakht hobn zikh im geplontet *oyfes, hiner, gendz un katshkes. eyner a hon, a royter, nokh gor a yungetshker, nor a groyser *azes-ponim, shpringt im mit *khutspe in di oygn arayn, lakht un zingt im epes a modne lidl:

ku-ka-ri-ku, lange noz!
m'et dikh pakn vi a hoz!
m'et dikh bindn, m'et dikh shlogn,
m'et dikh leygn in a vogn,
m'et dikh mutshen on a *sof,
m'et dikh koyln vi an *of!...

dos lidl lozt oys der royter hon mit a kukariku, un es dakht zikh oys undzer held, az di *oyfes, di gendz mit di katshkes, vos dreyen zikh arum im, kvokn, gogotshen un lakhn oyf *meshune-modne *koyles, un azoy shtark, az er vert oyfgeregt, tut zikh a loz tsum hon tsum *sheygets, un far groys *kas khapt er zikh oyf mit a *moyredik hartsklapenish un derhert a *rash, a tuml, a geruder, a klaperay fun fis, a shayn fun a likht, un *koyles, vilde, umbekante *koyles: "nisht der!... ot der!... yo-yo!... nemt im!... khapt im!... bint im!... pavolye di fis!... brekht im nisht oys keyn fus!... ot azoy!... fartik?... nu, rir zikh! rir zikh!... di nakht shteyt nisht!... marsh in vogn arayn!... un er derfilt gezunte hent, vi ayzerne tsvangen, haltn im, bindn im, dreyen im tsunoyf di fis, un me tut im a khap-oyf in der luftn un a vorf-arayn in a breytn hoykhn vogn arayn. in vogn ligt nokh a *nefesh, azoy vi er, dakht zikh, a *nekeyve, un tsitert mit ale *eyvrim. tsvey mentshn dreyen zikh arum zey. eyner - a *pere-odem, on a hitl, der anderer - oykh a *pere-odem, mit a kutshme oyfn kop. der vos on dem hitl shteyt hintn, batrakht dem vogn, di reder, di ferdlekh. un der vos mit der kutshme hot zikh aroyfgezetst oyfn vogn, un glaykh tsu zey oyf di fis, un mit aza *retsikhe, az zey hobn zikh derzen mit yener velt...

- gib nor akhtung, zey zoln zikh bay dir nisht oyfbindn, nisht aroysglitshn, nisht aropshpringen. du herst, tsi neyn? azoy zogt der, vos on dem hitl, tsu der kutshme, un di kutshme entfert nisht. er derlangt a rekhtn shmits di ferd, un der vogn rirt.

*B[eys]

di gefangene shlisn kentshaft in gefenkenish

vi azoy zey hobn ibergelebt di dozike nakht un nisht oysgegangen oyfn vogn far shrek aleyn - iz take nor a *nes *min-hashomayim. vu zenen zey?
vuhin firt men zey? un far vos? far ven?...

iber groys fintsternish hobn zey *afile nisht gekont zikh rekht onkukn. ersht, az s'hot ongehoybn tsu togn, hobn zey genumen batrakhtn eyns dos andere un *durkhshmuesn zikh shtilerheyt.

- gut morgn, madam!
- gut morgn, gut yor!
- ikh volt gemegt shvern, az ir zent fun undzere... fun di indyaner...
- ir farshport shvern, me gloybt aykh on a *shvue...
- ikh hob aykh glaykh derkent, nokh di kareln.
- dos bavayzt, az ir hot an oyg.
es geyt avek etlekhe minut. nokhdem ruft er zikh on tsu ir vider a mol:
- madam! vi filt ir zikh?
- aza yor oyf mayne *sonim!
er lozt durkh nokh a vayle un roymt ir ayn a *sod oyfn oyer:
- madam, ikh vil aykh epes fregn.
- fregt.
- in vos bashuldikt men aykh?
- dos eygene, vos aykh.
- ikh meyn, vos hot ir azoyns farzindikt?
- dos eygene, vos ir.
- mir shaynt, az ir zent mir epes vi *broygezlekh?
- *broygezlekh? nakhal! er hot zikh avekgezetst bay mir oyf di fis, az se shparn mir di oygn fun kop, un zogt nokh, az ikh bin *broygezlekh!
- vos redt ir dos, madam? ikh zits bay aykh oyf di fis?
- ver den zitst?
- dos iz er! ot der *pere-odem mit der kutshme. farkhapt zol er vern!
- azoy gor? un ikh hob gemeynt, az dos kvetshn, vos se kvetsht mikh, iz fun aykh. hot keyn faribl nisht, *tomer hob ikh aykh baleydikt.

dos iz in gantsn, vos zey hobn gekont zogn eyns dem andern. vorum es khapt zikh oyf di kutshme, vi fun dem shlof, un shmayst, shmayst di ferd mit *kas. der vogn shpringt-unter, di tsvey indyaner hern zikh tsu, vi es treyslen zikh bay zey ineveynik di *gdorim. plutsem shtelt zikh op der vogn, un zey derzeen far zikh azelkhes, vos zey hobn nokh oyf zeyer lebn nisht gezen keyn mol.

*G[iml]

fun eyn gefenkenish in dem andern

dos ershte mol oyf zeyer lebn iz zey oysgekumen tsu zen oyf eyn ort azoy fil ferd, *beheymes, kelblekh, *khazeyrim, un mentshn, on a *shir mentshn!
alerley vogns mit untergehoybene shtekns, ful mit farsheydene *skhoyres, broyt un lebedike zakhn: hiner, gendz un katshkes, ongepakt eyns oyf dos andere. dort, in der zayt, eyner aleyn oyf a vogn, ligt a gebundener *dover-akher un protestirt, kvitshet mit azelkhe *meshune *koyles, az me kon toyb vern. nor ver hert im? ale loyfn, ale redn, ale zenen fartareramt - s'iz a *yerid.
ahertsu hot zey gebrakht tsu firn der *pere-odem, vos mit der kutshme, aroysgekrokhn funem vogn un genumen bobren zikh mit di gefangene. un di gefangene hobn zikh oyfgekhapt, gefilt a modne hartsklapenish: "vos vet er ton mit zey, ot der *pere-odem? *efsher oyfbindn? bafrayn un lozn geyn, vu di oygn veln trogn?"... akh, umzist iz geven zeyer freyd - er hot zey nor aroyfgerukt a bisl hekher, *a ponim, az me zol zey beser kenen zen? aza *bizoyen! aza *bizoyen!... un *efsher, az me vil rekhenen dos eygene tsurik, ken zayn, az es iz glaykher, vos ale zeen zey! *aderabe, loz di velt zen! *efsher vet zikh gefinen a gute zel, vos vet tsugeyn, zikh onnemen zeyer krivde, un a freg ton bay dem *pere-odem: far vos? far ven?
azoy hobn zikh getrakht nebekh di umshuldike gefangene - un glaykh vi zey hobn getrofn: es hot zikh take gefunen a gute zel, epes eyne a grobe, mit a terkisher shal. zi geyt tsu, tut a tap in vogn un a zog tsu der kutshme:

- dos host du gebrakht tsu firn dos porfolk?
- vos iz dayn *eysek?
- indyaner?
- vos den, terkn?
- vifil heyst du zikh gebn far zey?
- vu host du azoy fil gelt?
- ikh zol nisht hobn keyn gelt, to tsulib vos volt ikh zikh avekgeshtelt redn mit aza *kham, vi du bizt?

ot azoy *shmuesn zikh durkh di terkishe shal mit der kutshme, un es geyt avek bay zey a dingenish oyf lang. der *pere-odem, vos mit der kutshme, iz kalt vi ayz, di terkishe shal hitst zikh, shpringt op ale mol un geyt avek, un kumt ober bald tsurik, un vider a mol nemt men zikh dingen, azoy lang, biz di kutshme vert in *kas, un me heybt zikh on sheltn. dos porfolk dervayl varft zikh durkh mit a por verter:

- madam! ir hert, tsi neyn?
- ikh her, vos den? ikh her nisht?
- es halt derbay, me zol undz, *a ponim, oyskoyfn fun gefenkenish?
- azoy vayzt dos oys.
- vos zhe dingt zi zikh far undz, vi me dingt zikh far gendz?
- az okh un az vey!
- lozn zey zikh shlogn kop on vant, abi mir zoln aroys fray.
- *omeyn *halevay!

danken got, di terkishe shal hot shoyn arayngeleygt di hant in keshene, nemt aroys gelt.

- *haklal, iz nisht vintsiker?
- nisht vintsiker.
- dos iz shoyn dos letste *shebeletste?
- dos letste *shebeletste
- *efsher... sha, sha! ze nor a *retsikhe fun a mentshn! na dir gelt, na!

un dos porfolk geyt iber funem *reshus fun dem *pere-odem mit der kutshme in *reshus fun der grober mit der terkisher shal, dos heyst, eygntlekh, fun eyn gefenkenish inem andern, vi mir veln zen vayter.

*D[aled]

tsvishn vilde mentshn

vi bald me hot zey gebrakht oyfn nayem ort, azoy hot men zey bald oyfgebundn, un mit freyd hobn zey derfilt di erd unter zikh. zey hobn genumen oysglaykhn zikh di beyner un arumshpanen hin un tsurik, oyspruvn oyf vifil di fis dinen zey nokh, un far groys *simkhe hobn zey gornisht bamerkt, az zey zenen nokh gants vayt fun di *emese frayhayt. ersht a minut shpeter hobn zey zikh arumgekukt, az zey zenen in gefenkenish. me hot zey arayngelozt ergets in a fintster vinkl, fun eyn zayt a varemer oyvn, fun der anderer zayt a kalte vant, un fun fornt opgetsamt mit an ibergekertn leyter. un esn hot men zey avekgeshtelt un trinken, un me hot zey ibergelozt eyne aleyn, vi es redt zikh, oyf gots barot. batrakht zeyer naye voynung, hobn zey zikh avekgeshtelt eyns kegn andern ongeblozn, vi geveynlekh vild-fremde, gekukt, gekukt un oysgedreyt zikh eyns tsum andern, *mekhile, mitn hintn un tsegangen zikh, er in eyn vinkele, zi inem andern, un me hot zikh fartift itlekher in zayne *makhshoves.

lang trakhtn hot men ober zey nit gelozt. es hot zikh geefnt di tir fun zeyer turme un s'iz arayngekumen frier di terkishe shal, un nokh ihr alerley vayber, eyne nokh der anderer. yede bazunder hot di terkishe shal ongenumen bay a hant, tsugefirt tsu di gefangene, a vayz gegebn mitn finger un a zog geton mit a shaynendik *ponim:

- gefelt aykh dos porfolk?
- vifil hot ir avekgegebn?
- shatst.

ale hobn geshatst un nisht eyne hot getrofn, un az di terkishe shal hot zey ongerufn di sume, hobn ale vayber gegebn a plesk mit di hent:

- take *beemes?
- mir zoln azoy ale hobn a freylekhn, a *koshern *Peysekh! oyf di *penimer fun di vayber iz geven ongetseykhnt *kine. zeyere beklekh hobn geflamt. in di oygn hot gebrent a fayerl. nor es hobn zikh a shot geton vintshevanyes:
- farnitst gezunt!
- zol aykh voyl bakumen!
- derlebt iber a yor!
- mit ayer man un mit ayere kinderlekh!
- *omeyn! *gam atem! *gam atem!

ale vayber geyen avek. in a minut arum kumt on di terkishe shal tsurik un shlept mit zikh eynem a mansbil, a vildn parshoyn, a bavaksenem mit royte hor. zi firt im tsu mit dem zelbn shaynendikn *ponim:

- du bist dokh yo a *meyvn. vos zogst du oyf dem porfolk?

der bavaksener parshoyn kukt mit vilde oygn.

- ikh bin a *meyvn? vos far a *meyvn bin ikh?
- du bist dokh a yid fun *toyre, un vu *toyre, dort iz *khokhme. vi meynst du, a shteyger, - meg undz shoyn got gebn a *koshern *Peysekh? s'iz dokh fun zayn libn nomen vegn.

der bavaksener parshoyn glet zikh bay di gele hor, farglantst di oygn aroyf, makht a frum *ponim:

- der eybershter meg gebn ale yidn a *koshern *Peysekh.

di terkishe shal mitn bavaksenem parshoyn geyen avek, un dos porfolk blaybt vayter aleyn. zey shteyen a vayle on *loshn, ongeblozn eyns oyf dos andere, vi frier. zi lozt aroys a modnem hilkh funem haldz, a *min hust mit a kvitsh. er dreyt oys dem kop tsu ir:

- madam! vos iz mit aykh?
- gornisht. ikh hob mikh dermont in der heym.
- narishkaytn! dos darf men fargesn. me darf zikh beser arumkukn, vu zenen mir un vos hobn mir tsu ton?
- vu zenen mir? in der erd zenen mir. mir zenen oyf groyse *tsores.
- *dehayne?
- ir fregt nokh? ir zet nisht, az me hot undz farkoyft tsu di vilde mentshn, vi me farkoyft hiner, gendz oder katshkes?
- vos zhe veln zey undz ton?
- oy veln zey undz ton! nokh az ikh bin geven a kleyninke, hob ikh zikh ongehert sheyne *mayses, vos di vilde mentshn tuen mit undzere layt, vos faln arayn tsu zey in di hent arayn...
- et! *mayses!... gloybt nisht in keyn *bobe-mayses...
- nisht keyn *bobe-mayses. ikh hob dos aleyn gehert fun mayn shvester... mayn shvester dertseylt, az zey zenen erger fun di vilde *khayes. a vilde *khaye, az zi khapt emitsn fun undz, tserayst zi im un frest im oyf - un a *sof; un az...
- te-te-te, madam! ir kukt oyf der velt, dakht mir, shoyn tsu pesimistish.
- tsu vos?
- tsu pesimistish.
- vos heyst dos pesimistish?
- dos heyst... dos heyst, ir kukt durkh tsu tunkele briln.
- vu zet ir briln?
- kha-kha-kha!
- vos lakht ir?
- oy, zent ir, madam, a...
- a vos?

er hot ir gevolt zogn, vos zi iz. nor plutsem efnt zikh di tir un...

leyent vayter.

*H[ey]

"halt-dir-na-dir-nem-dir!"

es efnt zikh di tir un es rayst zikh arayn fun droysn, vi a shturemvint, vi a gantser polk soldatn, *khevre kleynvarg, *kundeysim, mit royte beklekh un mit shvartse eyglekh. zey tuen zikh a loz ale mit a mol tsum untern-oyvn.

- anu? vu zenen zey? vu? oto zenen zey, ototot! eh! *Yankl! Berl!
Velvl! *Elye! Getsl! gikher! gikher!

un do heybt zikh on far undzer porfolk der *emeser *genem: *tsores un payn un *yisurim un *bizyoynes on a *shir! *khevre kleynvarg zenen ongefaln oyf zey, vi di vilde *proim, genumen tantsn un shpringen arum zey, batrakhtn zey fun ale zaytn un makhn fun zey *khoyzek, *khukhe-tlule.

- *yosl, ze nor a noz! kha-kha-kha!
- a nyonye! Berl! a nyonye!
- Velvl! tu im a tsi bay der noz!
- baym shnobl, *Elye! ot azoy o!
- shtarker, Getsl, loz er onheybn shrayen!
- ir zent ale *naronim! shrayen - shrayen zey nor demolt, ven me fayft zey, zey hobn faynt, az me fayft zey. a *simen hot ir, ot heyb ikh on fayfn! fyu!

dos porfolk blozn zikh on, vern royt, lozn arop di nez un shrayen oys beyde mit a mol:

- halt dir! halt dir! halt dir!

*khevre kleynvarg khapn unter ale in eynem mit a vildn gelekhter:

- halt-dir-na-dir-nem-dir!

dos porfolk vern nokh mer ongetsundn un shrayen nokh hekher:

- halt dir! halt dir! halt dir!

dos gefelt der *khevre kleynvarg *davke zeyer shtark. zey haltn zikh bay di zaytn far gelekhter un shrayen nokh hekher:

- halt-dir! na-dir! nem-dir!

fun aza *min veln aribershrayen eyns dos andere vert di shtub ongefilt mit azelkhe *koyles, az es kumt tsu flien di terkishe shal (lang lebn zol zi!), khapt on *khevre kleynvarg farn kark un shlaydert zey aroys eyntsikvayz fun shtub un teylt zey nokh ayn derbay a por gute stusakes un lozt oys mit a langer *klole:

- a shlak zol oyf aykh kumen, *reboyne-shel-oylem, a *sreyfe, a *mageyfe, a *kholere! s'zol aykh onkhapn un s'zol aykh koyklen un koyklen un oyskoyklen aykh eyntsikvayz mit ale *meshumodim, ziser got, un s'zol fun aykh nisht blaybn biz *Peysekh keyn *sorid upolet, liber foter, hartsiker, getrayer!

*poter gevorn funem dozikn *goles, hot undzer porfolk nokh lang nisht gekont kumen tsu zikh. di vilde geshreyen mitn fayfn, mitn gelekhter fun di kleyne vilde *nefoshes zenen nokh lang geshtanen un gehilkht zey in di oyern. nokhdem hot er zikh ongehoybn arumkukn, az s'iz nisht keyn *takhles tsu troyern oyfn *goles un nisht nemen gornisht in moyl arayn. un er geyt tsu pavolinke tsum onbaysn, vos me hot zey avekgeshtelt, un ruft zikh on tsu ir:

- madam! biz vanen iz der *shir tsu shteyn ot azoy farzorgt? tsayt epes iberkhapn. di velt iz oykh a velt, kh'lebn. di *neshome oysshpayen kon men nisht. fargest nisht, az mir hobn nokh hayntikn tog in moyl nisht gehat.
- est gezunterheyt. ikh - nisht.
- khm... far vos? s'iz bay aykh haynt a *tones?
- nisht keyn *tones, nor glat azoy.
- ir vilt zey *efsher onlernen? hungern? ir vet nor makhn fun zikh a *tel, un vayter nor nisht...
- ikh veys nisht, vi azoy me kon epes esn. es krikht nisht in haldz arayn.
- es krikht, es krikht. der ershter bisn iz an ekber.
- a vos?
- ayn ekber.
- modne verter bay aykh!
- kha-kha-kha?
- vider kha-kha-kha? vos iz der gelekhter?
- ikh hob mikh dermont inem *borekh-habe fun di kleyne *mamzeyrim.
- *avade darf men lakhn.
- vos zhe? veynen darf men?
- far vos hot ir nisht gelakht, feter, *beshas zey hobn gefayft?
- vos den hob ikh geton?
- ir hot, dakht zikh, genug gepildert!
- ikh hob gepildert? ikh?
- ver den hot gepildert? ikh?
- ir hot di ershte ongehoybn shrayen: halt dir! halt dir! halt dir!
- hot keyn faribl nisht, dos zent ir geven der ershter, vos hot gezogt:
halt dir! halt dir! halt dir!
- nu, vos zhe iz do a *bizoyen, az ikh bin geven der ershter, vos hob gezogt: halt dir! halt dir!?
- vos far a *kharpe iz, az ikh bin geven di ershte, vos hob gezogt: halt dir! halt dir!?
- az s'iz nisht a *kharpe, vos-zhe hot ir aropgelozt di noz, madam?
- ikh hob aropgelozt di noz?
- ver den hot aropgelozt di noz?
- akh, vi gring s'iz tsu zen yenems noz!...

an *aveyre, vos der doziker interesanter *shmues hot zikh nisht gekent tsien vayter. me hot zey ibergeshlogn same in mitn. dos iz geven di terkishe shal, vos hot geveltikt oyf zey in gefenkenish, vi es shteyt geshribn vayter.

*V[ov]

di ekzekutsye fun di vayber

di terkishe shal iz nisht geven di eyntsike, vos hot geveltikt oyf zey in gefenkenish. zey iz bashert geven tsu bakenen zikh mit nokh eyne a vilde *brie, inem geshtalt fun a griner moyd mit a royter fatsheyle oyfn kop. arayngekumen zenen zey beyde mit fule hent fun *kol-tev: a shisl mit rayz, oysgemisht mit arbes un mit fasolyes, a teler mit gekokhte kartofl, mit gehakte eyer, un a fuln fartekh mit ongeshnitene shtiklekh epl un mit veltshene nis. arayngekumen mitn esnvarg, hot di grine moyd mit der royter fatsheyle a vayz geton oyfn porfolk un a zog geton tsu der terkisher shal:

- a *make iz mir, *bal-eboste lebn, zet nor, zey hobn zikh *kimat nisht tsugerirt tsum esn!
- di *dayge zol mir blaybn oyf, *im-yirtse-hashem, nokh *Peysekh. ot veln mir zey bald onhodeven. ikh vel zey nemen tsu zikh, zey tsuhalten, un du vest zey leygn dos esn in moyl arayn. nu, moyd? vos shteystu? vos shtshirest du mit di tseyn?
- vos hobn zey azelkhes derzen oyf mir, vos zey hern nisht oyf tsu pilderen: halt dir! halt dir!?
- a *farsarfet zolstu vern, du narishe moyd! tu oys di royte fatsheyle dayne! zey konen nisht zen keyn royte farb!...
- mayne *tsores oyf zeyere kep!
- oyf dayn kop, narele, du bist bilkher. ot azoy o! nu? far vos leygst du im nisht in moyl arayn keyn rayz mit fasolyes?
- far vos ikh leyg im nisht? in mir iz keyn *menie nisht. ikh volt im geleygt fun haynt biz morgn, nor ir zet dokh, az er lozt zikh nisht. er dreyt mitn kop un halt tsu dos moyl.
- ver hert im? ot gib ikh im a kvetsh baym haldz, vet er bay mir efenen di piskes! ot azoy o! leyg-leyg!
- oy, *bal-ebostinke! gezunt zolt ir mir zayn! epes glantst er mir zeyer mit di oygn! zet nor, er zol zikh *kholile nisht dervergn.
- ver dervorgn beser du aleyn, du bizt bilkher. na dir gor dervergn! glaykh vi s'iz bay mir dos ershte mol! shtup im glaykh in haldz arayn. ot azoy. ikh bin shoyn eyn un tsvantsik yor a *bal-eboste mit gots hilf.

itst leyg im arayn in moyl a shtikl epl, mit a *yoder fun a velishn nus. nokh, nokh. vos zhalevest du?

- ikh zhaleve nisht. vos vel ikh zhaleven? s'iz mayn? s'iz nisht mer vi a *rakhmones a *tsar-bale-khayim.
- vos zogt ir oyf der moyd? a *tsar-bale-khayim! me tut im *kholile shlekhts? me git dokh im esn! un fun vemens vegn? fun gots vegn.
*lekoved dem heylikn *yom-tev. der eybershter meg mir take helfn. ikh hob im shoyn nisht eyn porl oysgehodevet oyf *Peysekh. geb aher nokh a velish nisl - un a *sof. itstiks mol vet zayn genug fun zaynet vegn. er iz shoyn zat. lomir zikh okersht nemen tsu ir un onhoybn fun *ma-toyvu, dos heyst, nokh a mol fun rayz mit fasolyes.
- zolt ir mir gezunt zayn, *bal-eboste lebn, vi azoy derkent ir, velkhes iz an "er" un velkhes a "zi"?
- ale beyze *khaloymes oyf dayn kop! me heyst ir ton an arbet, un zi iz do der *ruekh veyst mit vos! hob frier *khasene, narishe moyd, un ver aleyn a *bal-eboste, vestu demolt fregn. dervayl tu, vos me heyst dir. ot azoy o. nokh - nokh! zhaleve nisht! s'iz nisht tsulib keynem, s'iz tsulib zayn libn nomen. oyf *Peysekh! oyf *Peysekh!

geendikt di ekzekutsye, hobn zikh beyde vayber opgetrogn, un undzere umgliklekhe gepaynikte zenen geblibn aleyn. zey hobn zikh farshlogn beyde in a vinkele, aroyfgeleygt eyns oyfn andere di klogedike kep un fartift zikh in azelkhe troyerike *makhshoves, velkhe kumen zeyer zeltn, saydn a halb *sho farn toyt.

*Z[ayen]

der vorem ligt in khreyn un meynt, az keyn zisers iz nishto.

keyn zakh makht nisht azoy noent un frayndlekh, vi *tsores. der bester bavayz zenen di tsvey umgliklekhe heldn fun undzer geshikhte. in der kurtser tsayt fun zeyer gefenkenish zenen zey zikh tsunoyfgegangen mit di kharaktern, ongehoybn farshteyn eyns dos andere oyfn vunk, oyfgehert shemen zikh eyns far dos andere un gevorn azoy noent, az me hot oyfgehert zikh "irtsn" un men iz gevorn *nefesh akhes. er ir: "*neshomenyu!" zi im: "lyubenyu!" di terkishe shal mit der royter fatsheyle, araynkumendik mit esnvarg, hobn zikh gor zat nisht gekont onkukn in zey.

- vos zogst du oyfn porfolk?
- a lebn, vi untern oyvn!
- zest du khotsh, vi zey hobn zikh bay mir, keyn *ayn-hore, farrikht?
- keyn beyz oyg zol zey nisht shatn!
- tu zey nor a nem unter di pakhves... vos zogst du?!... nishkoshe fun a haytl?... ha? meg mir shoyn got helfn farn porfolk, vos ikh hob im oysgehodevet oyf *Peysekh?...

di vilde vayber tuen op zeyer arbet un geyen avek, un dos porfolk fartrakht zikh. vos badaytn di verter fun der terkisher shal: "zi hodevet zey oyf *Peysekh?" un far vos darf ir got helfn?... un me sharft zikh di *moykhes un me diskutirt tsvishn zikh:

- vos heyst dos, lyubenyu, *Peysekh?
- *Peysekh, *neshomenyu, iz bay zey aza *yom-tev, aza *yom-tev fun frayhayt, fun bafrayung.
- vos heyst dos "fun bafrayung"?
- ikh vel dir gebn tsu farshteyn. s'iz bay zey a groyse *mitsve khapn a undzerikn un hodeven im azoy lang, biz es kumt der *yom-tev, vos heyst *Peysekh, un az es kumt der *yom-tev, vos heyst *Peysekh, lozt men im fray... haynt farshteyst du shoyn dem *seykhl?
- nokh vayt biz dem *yom-tev, vos heyst *Peysekh?
- vedlik ikh hob gehert fun der terkisher shal zogn, vayzt oys, az nit mer vi a tog dray.
- dray tog?!
- vos host du zikh azoy dershrokn, narishe? di dray tog veln iberflien, vi a *kholem, un s'vet kumen der liber *yom-tev *Peysekh, vet men undz efenen tir un toyer un me vet undz zogn: hayda kinderlekh, geyt aykh ahin, fun vanen ir zent gekumen! veln mir dos nemen shteln fis!...
- akh, lyubenyu, dayne zise reyd!... *alevay s'zol zayn azoy, vi du zogst! ikh hob ober *moyre far an ander zakh...
- harts mayns, du host *tomed *moyre...
- lebn mayns, du kenst nit di vilde mentshn.
- fun vanen kenst du zey, *neshomenyu?
- ikh hob zikh genug ongehert, lyubenyu, nokh in der heym dertseyln azelkhe *mayses oyf zey! mayne a shvester hot mir dertseylt, az zi hot aleyn gezen...
- vider a mol der shvesters *mayses? *neshomenyu, *mayses farges!
- lyubenyu! ikh volt veln fargesn, kon ikh nisht. zey pikn mir in kop arayn gantse teg. zey lozn mikh nit shlofn bay nakht.
- vos zhe iz dos far *mayses, vos pikn dir in kop arayn gantse teg, lozn dir nisht shlofn bay nakht?
- lyubenyu! vest nit lakhn fun mir?
- vos zol ikh epes lakhn, *neshomenyu?
- du host *tomed aza *teve, az ikh dertseyl dir epes, lakhst du mikh oys un zogst oyf mir, az ikh bin a *shatye, a geshleyerte handzye, a narishe inditshke un nokh azelkhe zakhn.
- ikh zog dir tsu, az ikh vel nit lakhn, abi dertseyl, vos host du gehert fun dayn shvester?
- mayn shvester dertseylt, az di mentshn, vos mir zeen, zenen erger fun di vilde *khayes. a vilde *khaye, az zi khapt emitsn fun undz, tserayst zi im un frest im oyf - un a *sof. mentshn tuen nit azoy. a undzeriker, az er falt arayn tsu di mentshn in di hent arayn, haltn zey im farshpart, gebn im esn un trinken fun der fuler hant, biz er vert gut fet...
- nu?
- un az er vert gut fet, koyln zey im, shindn im op di hoyt, tseshnaydn oyf shtiklekh un bazaltsn im mit zalts un veykn im in vaser...
- nu, un vayter vos?
- un vayter tseleygn zey a fayer un brotn im oyf zayne eygene shmalts un esn im oyf mit di beyner.
- *bobe-mayses! geshikhtes fun toyznt eyn nakht! a ku iz gefloygn ibern dakh un geleygt an ey! un du, *shatye, gloybst dos? kha-kha-kha!
- nu! hob ikh nit gezogt frier, az du vest mikh oyslakhn?
- vos zhe den? az fun danen biz ahin heybt ir nit on tsu farshteyn!
mir dakht, az du host gehert a mol hundert fun der terkisher shal, az dos, vos me hodevet undz iz nit tsulib keynem, nor tsulib got.
- lebn mayns! vos-zhe iz derfun gedrungen?
- iz derfun gedrungen, *neshome mayne, az du bizt a narishe inditshke, un vayter gornisht.
- ir hot *tomed aza *teve. yenem baleydikn iz bay aykh tfu!
- ver iz geven der ir?
- ikh meyn aykh, ale mansbiln.
- ale mansbiln? mit vifil mansbiln bizt du dos bakant, volt ikh gevolt visn?
- ikh ken zikh mit eynem, iz genug far mir.
- neyn, host gezogt "mansbiln". di *mashmoes, az *a khuts mir hostu zikh gekent mit nokh emitsn?
- vos nokh vestu oystrakhtn?
- shoyn! zi hot shoyn aropgelozt di noz... kum nor aher, ikh vil dir epes zogn...

di dozike stsene fun kutsenyu-mutsenyu vert plutsem ibergerisn durkh der *khevre kleynvarg fun yener zayt fenster. ineveynik arayngeyn lozt men zey nit, kumen zey ale tog tsu tsum fentster, fun droysn, un fun dortn shtekn zey arayn di nez, makhn *meshugene *tnues, shteln aroys di tsung, lakhn un fayfn un shrayen un hilkhn ale in eynem: "halt dir! na dir! nem dir!"... dos porfolk, geveynlekh, entfert zey op deroyf oyf zeyer *loshn, shoyn nisht mit aza *kas, vi frier, nor glat, a shteyger, vi me entfert oyf "a gut morgn" - "gut yor". "*brukhim hayoyshvim" - "kumt esn" - "est gezunterheyt"...

s'iz gor nito, hert ir, aza zakh oyf der velt, vos a gots bashefenish zol dertsu nisht gevoynt vern. undzer porfolk iz shoyn azoy gevoynt gevorn mit di *tsores, az s'hot zikh dem oysgedakht, az azoy darf es tsu zayn, vi der vorem, vos ligt in khreyn, meynt, az keyn zisers iz shoyn nishto.

*Kh[es]

a beyz bagegenish mit an altn bakantn

s'iz geven a frimorgn. in droysn iz geshtanen a gedikhter tuman. in shtub iz nokh geven fintster. dos porfolk hot gehaltn same in rekhtn shlof. es hot zikh zey *gekholemt zeyer amolike heym. a groyser, a breyter, a frayer in droysn. a bloyer himl, grin groz. a zilbern taykhl. a mil, vos dreyt un klapt un shpritst mit vaser. gendz un katshkes plyosken zikh baym breg. hiner pikn. hener kreyen. feyglekh flien. akh, vos far a sheyne velt got hot bashafn fun zeyert vegn... fun zeyert vegn?... fun vemens den vegn zenen ot di hoykhe boymer mit di breyte tsvaygn, vos me kon unter zey arumshpatsirn frank un fray? oder fun vemens vegn iz ot di mil, vos arum ir hodeven zey zikh ale mit der gantser mishpokhe, lozn nisht tsu keyn fremdn far a mayl arum un arum? fun vemens vegn iz ot der groyser kaylekhiker himldiker brener, vos ale farnakht lozt er zikh arop in eyn ek taykh, un ale frimorgn bavayzt er zikh funem andern ek taykh? vos voltn zey itst nit avekgegebn, zey zoln nokh a mol a kuk ton! khotsh mit eyn oyg oyf der sheyner, varemer, fayerdiker zun? oyf dem groysn, breytn, frayen, likhtikn in droysn? oyf der mil un oyf altsding, vos arum der mil?...

same in di dozike gute, goldene *khaloymes hot men zey oyfgekhapt un aroysgetrogn zey in droysn aroys. di fraye luft fun dem tumanendikn frimorgn hot zey a zets geton in *ponim arayn un hot zey arumgenumen mit ir frishkayt fun ale zaytn. zey hobn derfilt, az s'iz zey oysgevaksn fliglen. ot khapn zey zikh oyf un flien in der velt arayn, flien iber dekher, iber gertner, iber velder, ahin, ahin, tsu zikh aheym... dort trefn zey zikh mit zeyerike: "*brukhim haboim, fun vanen kumt men?" - fun di vilde mentshn. - "vos hot men aykh geton?" - gehodevet oyf *Peysekh. - "vos heyst dos *Peysekh?" - aza *yom-tev bay zey, a guter, liber *yom-tev, a *yom-tev fun frayhayt, fun bafrayung...

azoy *kholemt dos gebundene porfolk dem gantsn veg, biz me brengt zey ergets in a shmol finster gesl un me lozt zey arop gebundenerheyt glaykh in der blote. dort derzeen zey a vant bashpritst mit blut, un a *sakh *oyfes gebundene lign oyf der erd, tsu tsvey un tsu dray mit a mol. bay der zayt shteyen vayblekh un meydlekh un *shmuesen zikh, lakhn, khikhiken. dos porfolk kukt zikh arum oyf ale zaytn - tsulib vos hot men zey aher gebrakht? vos tuen do di gebundene *oyfes? vos lakhn di vayblekh mit di meydlekh? vos badayt di blutike vant?... ot dos iz der guter liber *yom-tev *Peysekh? vu iz di frayhayt? di bafrayung?...

ot azoy klert zikh dos porfolk un batrakht di gebundene *oyfes, vos lign zikh azoy shtil un ruik, fregn nisht keyn *kashes, glaykh vi es darf azoy tsu zayn... nor eyne, a hun a shrayerin, rut nisht. zi rayst zikh mit ale *koykhes, patsht mit di fliglen in der blote un shrayt *meshugenervayz:

- lozt mikh! lozt mikh! ikh vil nisht lign! ikh vil beser loyfn! lozt mikh! lozt mikh!
- kukariku! - ruft zikh op a royter hon, vos ligt gebundn in eynem mit tsvey hiner, un tut a patsh mit di fligl: - vos zogt ir oyf der *khakhome? zi vil nit lign. zi vil beser geyn. zi vil beser loyfn. kha-kha-kha!

undzer held heybt oyf dem kop, kukt zikh ayn mit ale oygn inem roytn hon, dem *azes-ponim, un er filt, vi s'iz im farkilt gevorn dos blut un farglivert di *eyvrim. er volt gemegt shvern, az der *khevre-man iz im kentlekh! azoy kentlekh! un dos *kol zayns iz im azoy bakant. gvald! vu hot er zikh mit im bagegent?!... un er heybt zikh oyf nokh a bisl hekher, derzet im der royter hon un tsit oys oyf zayn hilkhiker sopran-shtime:

kukariku, lange noz!
m'hot geshtopt dikh on a mos
mit di beste zise zakhn,
me zol konen fun dir makhn
a gebrotns mit a krop,
fete yoykh a fuln top,
un a heldzl inem tsimes...

nisht bashert geven undzer roytn *meshoyrer tsu endikn zayn lidl. emitsns a hant hot im a nem geton, mit aza *koyekh un azoy umgerikht, az es hot im mit a mol opgenumen dos *loshn.

*T[es]

der letster akt fun der tragedye.

dos iz geven a *meshune-vilder *nefesh mit a farshlofn *ponim, a hoykher, a darer, mit lange *peyes, in shikh un zokn, untergeshtekt di poles, farkatshet di arbl, mit a shvarts glantsndik meser in hant. nisht lang getrakht, tut er a nem dem roytn hon tsu zikh, farrayst im dos kepl aroyf, tut im a kuk in di oygn arayn, flikt im oys dray federlekh, khik mitn meser ibern haldz un - marsh! - a shlayder fun zikh glaykh in der blote arayn. vi a pritshmelyeter blaybt nebekh lign der hon a vayle, un plutsem khapt er zikh oyf un lozt zikh loyfn mitn ibergeshnitenem haldz, dreyt mitn kop, glaykh vi er zukht emitsn, glaykh vi er hot epes farlorn. undzer held kukt zikh ayn in dem gekoyletn hon un derkent zayn altn bakantn, vos er hot amol gezen in *kholem, un dermont zikh dos lidl, vos der *khevre-man hot im demolt gezungen, un er kon keyn vort nisht aroysbrengen tsu zayn gelibter, vos ligt nebn im shtark tsugetulyet tsu zayn layb un tsitert un tsaplt mit ale *eyvrim... un der vilder *nefesh mitn glantsndikn meser tut zikh zayn arbet gants kaltblutik, vi an *emeser *talyen. eyns nokhs andere flien bay im di *oyfes. ale khapn a kitsl mitn meser ibern haldz un a shlayder in blote arayn. andere tsien zikh oys, geyen op mit blut, drigen mit di fislekh un tsaplen. andere varfn mit di keplekh, patshn mit di fliglen iber der blote. ale minut kumen tsu nokh un nokh *korbones mit ibergeshnitene heldzer. di vayblekh mit di meydlekh, vos shteyen bay der zayt, kukn un - gornisht. *aderabe, eynike fun zey faln aroyf oyf di gekoylete, nokh lebedike, *oyfes un flikn zey un raysn fun zey di federn, un *beys mayse redn zey zikh iber un vertlen zikh un lakhn, glaykh vi do volt zikh gegosn vaser, nisht keyn blut fun lebedike bashefenishn!... vu zenen zeyere oygn? vu zenen zeyere oyern? vu zenen zeyere hertser? zeyer *yoysher? zeyer got?...

azoy trakhtn zikh undzere tsvey umgliklekhe indyaner, vos lign nokh alts gebundn, un kukn zikh tsu tsu der doziker *moyrediker tragedye, tsu der doziker umgeherter *retsikhe in mitn heln tog. shoyn zhe hot men zey gebrakht aher tsulib dem zelbn tsvek, vos ale *oyfes, gendz un katshkes? shoyn zhe veln zey, di oysderveylte, di *meyukhosim, vos shtamen fun Indye, hobn aza vistn *sof glaykh mit dem dosikn prostn *oylem? iz dos, *a ponim, nisht keyn oysgetrakhte zakh, vos me dertseylt zikh on vegn di vilde mentshn? un di *nevies funem roytn hon?...

un zey heybn on farshteyn dem kaltn naketn *emes, un es vert zey klor altsding, vos zey hobn gehert, altsding, vos zey hobn gezen biz aher.
nor eyn zakh konen zey nisht tsekayen: tsu vos hot di terkishe shal ale mol zikh barimt, az got meg ir helfn derfar, vos zi hot im oysgehodevet aza porfolk oyf *Peysekh?... ot dos vil got? dos iz im lib? akh, vos far a beyzer got dos darf zayn bay ot di vilde mentshn!...

*  *  *  *  *  *  *  *  *  *  *  *  *  *  *  *  *  *  *  *  *  *

in etlekhe minut arum zenen undzere shtoltse indyaner, dos gelibte porfolk, gelegn oyf der erd, vi tsvey *poshete gekoylete indikes. zey hobn aroyfgeleygt eyns oyf dos andere zeyere ibergeshnitene nokh vareme heldzer un hobn oysgezen fun der vaytn, vi zey shlofn un *kholemen zise goldene *khaloymes. oyf zey iz gezogt gevorn der *posek:

[2S 1,23] *haneehovim vehaneimim bekhayeyhem uvemoysom loy nifrodu. - di libe un getraye, say baym lebn, say baym toyt hobn zikh nisht gesheydt.