di letste fun ale blinde

griner akvaryum 5: Di letste fun ale blinde

Ire oygn zenen farfleysht nit do vu bay alemen. Zey lebn ineveynik, in a bazunder *ponim - tsvey magnetishe nedelekh.
Ot di nedelekh tsien-tsu bliendike tsvaygn, zun un shotn, kolirn vi klapndike odern, *penimer un, der *iker, dos *ponim fun ir blindn gelibtn.
zey hobn beyde zikh bagegnt vi tsvey nekht un zeyer shteynerne blindkayt hot aroysgeshlogn funken.
Un az er, mit a *ponim fun a shoyb in regn, kletert bay nakht iber moyern, di *levone zol im aropvarfn a zilbernem hering, shpilt er oyf zayn langn *yerushedikn fayfyol, shpilt a nogndikn *nign, a *min feyglshe *levaye, un zi, in beydeml, zet ir gelibtn inem shpigl fun zayne klangen.

Eyn mol hot er zikh nit umgekert. A toybe sazhe hot batsoygn dem shpigl. Un zi - vi nokh a blindkayt volt arayn in der blinder!
zi tapt zayn shotn. Di shevelyure fun zayn shotn. Di magnetishe nedelekh tsien im nit tsu...
Emets hot arayngehakt a meser in a toytn!
Ire finger - tsen zhuzhendike binen - krayzn iber dem boydemdikn *kholel, vu di luft iz ibergebrent vi vayser ash. - Kum, shvester!

Ir kleyne, zeendike shvester, a halb nakete, a bukh untern orem, tsvey tseplekh vi an ofene sher, kvalt aroys fun shimerdikn vinkl mit a lempele in hant.
- Lern mikh oys tantsn, ikh hob keyn mol nit getantst, keyn mol nit in lebn.
Dos lempl - a sove mit eyn oyg - blaybt hengen oyf a belke. Unter im, in shayn funem blutikn oyg, tantsn di tsvey shvester. S'bagleyt zey der farshvundener fayfyol, di feyglshe *levaye...
- A dank, tayere, atsind loz mikh aleyn, ikh vil zen tsi got iz a blinder.
A tsiter nemt durkh dos beydeml, vi a nest baym derfiln a zeg.
Un di blinde genent pavolye tsum lempl, di zhuzhendike finger dreyen arop dem kaptur, banetsn mitn kerosin ire tsep, ir kleydl, un der soves oyg tut a fleyts mit fayer.

Iber geslekh vi heyln fun gayster - zun. Zun. Zun.
zun in bandazhirte shoybn. Zun in *penimer. Zun in *meysim, vos gefinen nit dem toyt...
Mentshn, tseshpoltene in tsvey bazundere profiln, farbeynern zikh vider bay dem royzikn opshayn fun ir tants. Un zi aleyn, di blinde, durkhoys in fayerdike oygn, tsindt on mit ir tants di geslekh, tsindt on di shtot, tsindt on di volkns:
- Bistu blind, mayn got, nem tsu mayn fayer!..

[6]  Tsvishn tsvey koymens
tsurik griner akvaryum