der toyt fun an oks

griner akvaryum 10:  Der toyt fun an oks

Mit brenendike herner, tsvey oysgekrimte vaksene likht, unter a geln shtralikn oreol, trogt zikh an oks mit a heyzerikn reven funem flamendikn shtal aroys, vi in zayn haldz volt geblibn shtekn a gildener *khalef. Dos tsugeklepte trukene mist fun zayn hinterteyl reykhert zikh in fyolete knoyln un zayne fodershte fis, aroyf biz der gembe, flakern baym same fleysh vi untergetsundn vildgroz.

Der falndiker ershter shney, glaykh emets volt faryogt fun himlshlak a rizike tshate perl-vayse yungitshke toybn, fartribn zey oyf der zindiker erd in mitn zeyer varemen shlof - der shney kon dem fayer nit aynleshn. ven di funken, di royte fliendike nodlen, vekn oyf mit a dinem shtokh di falndike toybn - gedoyert nit keyn "oy" - un di toybn vern farshlungen funem zhednem fayer. Un mitn *koyekh fun di farshlungene shneytoybn bushevet nokh vilder, mit mer *hanoe, dos fayer oyf zayn *korbn, shmidt im in kuperne ripn, zitst oyf zayn rukn vi a naketer satir un shmayst dem oks mit shayterdike baytshn.
tsu zayne oyern dertrogt zikh a mmmu, a groylik benkendiker mmmu, a duner mit opgehakte fligl...
Er kon nit entfern. S'moyl iz ofn, nor nit andersh - er hot farloyrn di tsung.
zayn impet yogt im vayter, s'fayer heybt fun der erd, fun di *shkiedik fintstere zumpn vos tsien zikh biz tsu an ozere.
Ersht demolt, ven er shturemt arayn biz di kni in ozere, un mit di fartoplte elipsene oygn, vi tsunoyfgeshmoltsn gloz fun a *sakh kolirn, derzet er in vaser nokh an oks, a kapoyerdikn, mit di brenendike herner arop, in himl arayn - nemt zikh kneytshn oyf zayn *ponim a mentshlekher shmeykhl.
Es platsn zayne kuperne ripn.
Der shney shit un shit.
Un der oks, dreyt oys dem kop oyf links, in der rikhtung tsu zayn heymishn derfl, vos fun im iz bloyz farblibn a fintsterer koymen, vi a toyte hant, un er tut zikh keyn rir nit.

A vayle flemlen nokh di herner, vi likht tsukopns fun a toytn, un leshn zikh tsuzamen mitn tog.

 [11]  Hintern goldenem shleyer
tsurik griner akvaryum