Bontshe Shvayg
do oyf der velt, hot Bontshe Shvaygs toyt gor keyn ayndruk
nisht gemakht!
fregt emetsn *bekheyrem: ver Bontshe iz geven, vi azoy er hot gelebt, oyf vos er iz geshtorbn!
tsi hot in'm dos harts geplatst, tsi di *koykhes zenen im oysgegangen,
tsi der markhbeyn hot zikh ibergebrokhn unter a shverer last... ver veyst?
efsher iz er gor far hunger geshtorbn!
a ferd in tramvay zol faln, volt men zikh mer interesirt.
es voltn tsaytungen geshribn, hunderter mentshn voltn fun ale gasn gelofn un di *neveyle bakukt; batrakht *afile dos ort, vu di *mapole iz geven...
nor dos ferd in tramvay volt oykh di *zkhie nisht gehat, es zol zayn azoy fil ferd vi mentshn - toyznt milyon!
Bontshe hot shtil gelebt un iz shtil geshtorbn; vi a shotn iz er durkh - durkh undzer velt!
oyf Bontshes *bris hot men keyn vayn nisht getrunken, es hobn keyn *koyses geklungen!
tsu *bar-mitsve hot er keyn klingendike *droshe nisht gezogt...
gelebt hot er vi a groy kleyn kerndl zamd baym breg fun *yam.
tsvishn milyonen zayns glaykhn; un, az der vint hot'n oyfgehoybn un oyf der anderer zayt *yam aribergeyogt, hot es keyner nisht bamerkt!
baym leben hot di nase blote keyn tseykhn fun zayn fus nisht bahaltn?
nokhn toyt - hot der vint dos kleyne bretl fun zayn *keyver umgevorfn;
dem *kabrens vayb hot es gefunen vayt fun *keyver un derbay a tepl kartofl opgekokht...
es iz dray teg nokh Bontshes toyt, fregt dem *kabren *bekheyrem, vu er hot'n geleygt!
volt Bontshe a *matseyve gehat, volt efsher iber hundert yor an altertum-forsher zi gefunen, un der nomen "Bontshe Shvayg" volt nokh a mol ibergeklungen in undzer luft.
a shotn! zayn fotografye iz nisht geblibn bay keynem in *moyekh, bay keynem in harts;
es iz fun im keyn *zeykher geblibn!
"keyn kind, keyn rind";
elnt gelebt - elnt geshtorbn!
ven nisht der mentshlekher geruder, volt *efsher emetser a mol derhert vi Bontshes markhbeyn hot unter der last geknakt;
volt di velt mer tsayt gehat, volt emetser *efsher a mol bamerkt, az Bontshe (oykh a mentsh) hot lebedikerheyt tsvey oysgeloshene oygn un shreklekh ayngefalene bakn;
az *afile ven er hot gor shoyn keyn last nisht oyf di pleytses, iz im oykh der kop tsu der erd geboygn, glaykh er volt lebedikerheyt zayn *keyver gezukht!
voltn azoy veynik mentshn vi ferd in tramvay geven, volt *efsher a mol emetser gefregt: vu iz Bontshe ahingekumen?!
ven men hot Bontshen in shpitol arayngefirt, iz zayn vinkl in suterine nisht leydik geblibn - es hobn deroyf tsen zayns glaykhn gevart, un tsvishn zikh dem vinkl "in flus" litsitirt;
ven men hot'n fun shpitolbet in toytnshtibl arayngetrogn, hobn oyfn bet tsvantsik oreme kranke gevart...
ven er iz aroys fun toytnshtibl - hot men tsvantsik *harugim fun unter an ayngefaln hoyz gebrakht - - ver veyst vi lang er vet ruik voynen in *keyver?
ver veyst vifl es vartn shoyn oyf dem shtikl plats...
shtil geboyrn, shtil gelebt, shtil geshtorbn un nokh shtiler bagrobn
. . . . . . . . . . .
nor nisht azoy iz geven oyf yener velt!
dortn hot Bontshes toyt a groysn ayndruk gemakht!
der groyser *shoyfer fun *Meshiekhs tsaytn hot geklungen in ale zibn himlen: Bontshe Shvayg iz *nifter gevorn. !
di greste *malokhim mit di breytste fligl zenen gefloygn un eyner hot dem andern ibergegebn:
Bontshe iz "*nisbakesh gevorn *beyeshive-shel-mayle!
in *gan-eydn iz a *rash, a *simkhe, a geruder: "Bontshe Shvayg!
a shpas Bontshe Shvayg!"
yunge *malokhimlekh mit brilyantene eygelekh, goldene drot-arbetndike fligelekh un zilberne pantofelekh zenen Bontshen antkegngelofn mit *simkhe!
der geroysh fun di fligl, dos klapn fun di pantofelekh un dos freylekhe lakhn fun di yunge, frishe, royzike maylekhlekh hot farfult ale himlen un iz tsugekumen biz tsum *kise-hakoved,
un got aleyn hot oykh shoyn gevust, az Bontshe Shvayg kumt!
*Avrom ovinu hot zikh in toyer fun himl geshtelt, di rekhte hant oysgeshtrekt tsum breytn "sholem-aleykhem" un a ziser shmeykhl shaynt azoy hel oyf zayn altn *ponim!
vos redlt azoy in himl?
dos hobn tsvey *malokhim in *gan-eydn arayn far Bontshes vegn a gingoldene fotershtul oyf redlekh gefirt!
vos hot azoy hel geblitst?
dos hot men durkhgefirt a goldene kroyn mit di tayerste shteyner gezetst!
alts far Bontshen!
nokh farn *psak fun *bes-din-shel-mayle?
fregn di *tsadikim farvundert un nisht gor on *kine.
- o! entfern di *malokhim, dos vet zayn a proste puste forme!
kegn Bontshe Shvayg vet *afile der *kateyger keyn vort in moyl nisht gefinen!
di "dyele" vet doyern finf minut!
- ir shpilt zikh mit Bontshe Shvayg? -
-----------
az di *malokhimlekh hobn Bontshen gekhapt in der luft un opgeshpilt im a *zemer;
az *Avrom ovinu hot im vi an altn kamerad di hant geshoklt;
az er hot gehert, az zayn shtul iz greyt in *gan-eydn;
az oyf zayn kop vart a kroyn;
az in *bes-din-shel-mayle vet men iber im keyn vort nisht redn - hot Bontshe, glaykh vi oyf yener velt, geshvign far shrek!
es iz im dos harts antgangen!
er iz zikher, az dos muz zayn a *kholem, oder a proster *toes!
er iz tsu beyde gevoynt!
nisht eyn mol hot im oyf yener velt *gekholemt, az er kloybt gelt oyf der podloge, gantse *oytsres lign...
un oyfgekhapt hot er zikh nokh a greserer *kabtsn vi nekhtn...
nisht eyn mol hot im emets far *toes tsugeshmeykhlt, a gut vort gezogt un ibergedreyt zikh un oysgeshpign...
- mayn *mazl, - trakht er - iz shoyn azoy!
un er hot *moyre di oygn oyftsuheybn, der *kholem zol nisht farshvindn;
er zol zikh nisht oyfkhapn ergets in a heyl tsvishn shlangen un ekdishn!
er hot *moyre fun moyl a klang aroystsulozn, mit a glid a ri tsu tun - men zol im nisht derkenen un avekshlaydern oyf *kaf-ekal.
er tsitert un hert nisht di *malokhims komplimentn, zet nisht zeyer tantsn arum im , er entfert nisht *Avrom ovinu oyfn hertslekhn "sholem-aleykhem", un - gefirt tsum *bezdin-shel-mayle - zogt er im keyn "gut-morgn" nisht...
oyser zikh iz er far shrek!
un zayn shrek iz nokh greser gevorn, az er hot , nisht vilndik, derzen di podloge fun *bes-din-shel-mayle.
same alabaster mit brilyantn!
"oyf aza podloge shteyen mayne fis!" - er vert in gantsn farshtart!
"ver veyst velkhn *gvir, velkhn *rov, velkhn *tsadik men meynt...
er vet kumen - vet zayn mayn fintsterer *sof!"
far shrek hot er *afile nisht gehert vi der prezident hot *befeyresh oysgerufn: "di dyele fun Bontshe Shvayg!" un, derlangendik dem *meylits-yoysher di aktn, gezogt: "lez, nor *bekitser!"
mit Bontshen dreyt zikh der gantser salon.
es roysht im in di oyern.
inem geroysh hert er dokh ale mol sharfer un sharfer dem *malekhs *meylitss zis *kol vi a fidl:
- zayn nomen - hert er - hot im gepast vi tsun a shlank layb a kleyd fun an artist a shnayders hant.
- vos redt ir? - fregt zikh Bontshe, un er hert vi an umgeduld *kol hakt im iber un zogt:
- nor on *mesholim!
- er hot zikh keyn mol - hoybt vayter on der *meylits-yoysher - oyf keynem nisht geklogt, nisht oyf got, nisht oyf layt;
in zayn oyg hot keyn mol nisht oyfgeflamt keyn funk fun has, er hot es keyn mol nisht oyfgehoybn mit a pretenzye tsum himl.
Bontshe farshteyt vayter nisht a vort, un dos harte *kol shlogt vayter iber:
- on retorik!
- *Iev hot nisht oysgehaltn.
er iz umgliklekher geven -
- faktn, trukene faktn! ruft nokh umgeduldiker der prezes.
- tsu akht tog hot men im *mal geven -
nor on realizm!
- a *moyhel a fusher hot dos blut nisht farhaltn -
- vayter!
- er hot alts geshvign (firt vayter der *meylits-yoysher) *afile ven di muter iz im geshtorbn un er hot tsu draytsn yor a shtifmame bakumen...
a shtifmame a shlang, a *marshas...
- meynt men dokh *efsher fort mikh? trakht Bontshe -
- on insinuatsyes oyf drite perzonen, beyzert zikh der prezes.
- zi flegt im kargn dem bisn...
eyernekhtik farshimlt broyt... horflaks far fleysh...
un zi hot kave mit smetene getrunken -
- tsu der zakh! shrayt der prezes.
- zi hot im far dos keyn negl nisht gekargt un zayn broyn-un-bloy layb flegt aroyskukn durkh ale lekher fun zayne farshimlt-tserisene kleyder...
vinter in di greste frest hot er ir borves oyfn hoyf holts gehakt, un di hent zenen tsu yung un tsu shvakh geven, di kletslekh tsu dik, di hak tsu shtumpik...
nisht eyn mol hot er zikh di hant fun di gelenkn oysgerisn, nisht eyn mol hot er zikh di fis opgefroyrn, nor geshvign hot er, *afile zikh farn foter -
- farn *shiker! lakht arayn der *kateyger, un Bontshen vert kalt in ale *eyvrim -
- nisht geklogt, endikt der *meylits-yoysher dem zats.
- un shtendik elnt - firt er vayter - keyn *khaver, keyn *talmed-toyre, keyn *kheyder... keyn gants *beged... keyn fraye minut -
- faktn - ruft vayter der prezes.
- er hot geshvign *afile shpeter, ven der foter hot'n, *shikererheyt a mol ongekhapt bay di hor un in mitn a shneyendiker vinternakht aroysgevorfn fun shtub!
er hot zikh shnel oyfgehoybn fun shney un iz antlofn vu di oygn hobn im getrogn...
oyfn gantsn veg hot er geshvign...
baym grestn hunger hot er nor mit di oygn gebetlt!
ersht in a shvindldiker, naser frilingnakht, iz er in a groyser shtot arayngekumen, er iz arayn vi a tropn in a *yam un dokh hot er di eygene nakht in arest farbrakht...
er hot geshvign, nisht gefregt far vos, far ven?
er iz aroys un di shverste arbet gezukht!
nor er hot geshvign!
shverer far der arbet iz geven zi tsu gefinen - er hot geshvign!
bodndik zikh in kaltn shveys, tsuzamengedrikt unter der shverster last, baym grestn kramp in leydikn mogn - hot er geshvign!
bashpritst fun fremder blote, bashpign fun fremde mayler, geyogt fun trotuarn mit der shverster last arop in gasn tsvishn droshkes, karetn un tramvays, kukndik yede minut dem toyt in di oygn - hot er geshvign!
er hot keyn mol nisht ibergerekhnt, vifl pud last es kumt oys oyf a groshn, vifl mol er iz gefaln bay yedn gang far a drayer, vifl mol er hot shir-nisht ni *neshome oysgeshpign, monendik zayn fardinst;
er hot nisht gerekhnt, nisht zayn, nisht yenems *mazl, nor geshvign!
zayn eygn fardinst hot er oykh nisht hoykh gemont!
vi a betler hot er zikh bay der tir geshtelt, un in di oygn hot zikh a hintishe *bakoshe gemolt!
"kum shpeter" un er iz farshvundn shtil vi a shotn, *kdey shpeter nokh shtiler oystsubetlen zayn fardinst!
er hot *afile geshvign, ven men flegt im opraysn fun zayn fardinst, oder araynvarfn a falshe *matbeye!...
er hot alts geshvign...
- meynt men dokh take mikh! treyst zikh Bontshe.
----------
- eyn mol - firt vayter der *meylits-yoysher nokh a trunk vaser - iz in zayn leben an enderung geshen...
es iz durkhgefloygn a kotsh oyf gumene reder mit tseploshete ferd...
der shmayser iz shoyn lang fun vaytns gelegn mit a tseshpoltenem kop oyfn bruk...
fun di dershrokene ferds mayler shpritst der shoym, fun unter di podkoves yogn zikh funken, di oygn blishtshen vi brenendike shturkatsn in a fintsterer nakht - un in kotsh zitst nisht toyt nisht lebedik a mentsh!
un Bontshe hot di ferd farhaltn!
un der gerateveter iz geven a yid a *bal-tsdoke un hot Bontshen di *toyve nisht fargesn!
er hot im dem gehargetns baytsh ibergegebn;
Bontshe iz a shmayser gevorn!
nokh mer - er hot im *khasene gemakht, nokh mer - - er hot im *afile mit a kind farzorgt -
un Bontshe hot alts geshvign!
- mikh meynt men, mikh!
bafestikt zikh Bontshe in der *deye, un hot dokh nisht di *hoze an oyg tsu varfn oyfn *bes-din-shel-mayle"...
er hert zikh vayter ayn tsum *malekh-meylits:
- er hot geshvign *afile ven zayn *bal-toyve hot in kurtsn bankrotirt un im zayn loyn nisht batsolt...
er hot geshvign *afile ven dos vayb iz fun im antlofn un ibergelozt im a kind fun der brust...
er hot geshvign *afile mit fuftsn yor shpeter, ven dos kind iz oysgevaksn un genug shtark geven - Bontshen aroystsuvarfn fun shtub...
- mikh meynt men, mikh! freyt zikh Bontshe.
----------
- er hot *afile geshvign - hoybt on veykher un troyeriker der *malekh-meylits - ven der eygener *bal-toyve hot zikh mit ale oysgeglaykht, nor im keyn groshn *skhires nisht tsurikgegebn - un *afile demolt, ven er iz Bontshen (vayter forndik oyf a kotsh mit gumene reder un ferd vi leybn) ibergeforn...
er hot alts geshvign!
er hot *afile der politsay nisht gezogt, ver es hot im tsurekhtgemakht...
----------
er hot geshvign *afile in shpitol, vu men meg shoyn shrayen!
er hot geshvign *afile ven der doktor hot on fuftsn kopikes nisht gevolt tsugeyn tsu zayn bet, un der vekhter, on finf kop[ikes] - toyshn di vesh!
er hot geshvign baym *goysesn - er hot geshvign baym shtarbn...
keyn vort kegn got, keyn vort kegn layt!
- diksi!
---------
Bontshe hoybt on vayter tsu tsitern oyfn gantsn layb.
er veyst az nokhn *meylits-yoysher geyt der *kateyger!
ver veyst vos der vet zogn!
Bontshe aleyn hot zayn leben nisht gedenkt.
nokh oyf yener velt hot er yede minut di frierdike fargesn...
der *malekh-meylits hot im alts dermont...
ver veyst vos der *kateyger vet im dermonen!
- *raboysay! hoybt on a sharf-shtekhndik-briendik *kol -
nor er hakt op -
- *raboysay, heybt er nokh a mol on, nor veykher un hakt vayter op.
endlekh hert zikh, fun dem eygenem haldz aroys, *kimat a veykh *kol:
- *raboysay! er hot geshvign! vel ikh oykh shvaygn!
es vert shtil - un fun fornt hert zikh a naye veykhe tsiterdike shtime:
- Bontshe, mayn kind Bontshe! ruft im vi a harfe...
mayn hartsik kind Bontshe!
in Bontshen tseveynt zikh dos harts...
er volt shoyn atsind di oygn geefnt, nor zey zenen farfintstert fun trern...
es iz im azoy zis-veynendik keyn mol nisht geven...
"mayn kind", "mayn Bontshe" - zayt di muter iz geshtorbn, hot er aza *kol un azoyne verter nisht gehert -
- mayn kind! firt vayter der *av-bes-din - du host alts gelitn un geshvign!
es iz nishto keyn gants glid, keyn gants beyndl in dayn layb on a vund, on a blutik ort, es iz nishto keyn eyn bahaltn ort in dayn *neshome, vu es zol nisht blutn...
un du host alts geshvign...
dort hot men zikh nisht farshtanen deroyf!
du aleyn host gor *efsher nisht gevust, az du kenst shrayen, un az fun dayn geshrey kenen *Yerikhes moyern tsitern un aynfaln?
du aleyn host fun dayn farshlofenem *koyekh nisht gevust...
oyf yener velt hot men dayn shvaygn nisht baloynt, nor dort iz der *oylem-hasheker, do oyfn *oylem-hoemes, vestu dayn loyn bakumen!
dir vet es keyn *kheylek nisht oys- un nisht opteyln: nem dir, vos du vilst!
ales iz dayn!
Bontshe heybt dos ershte mol di oygn oyf!
er vert vi farblendt fun der likht fun ale zaytn!
ales blankt, ales blishtshet, fun ales yogn shtraln: fun di vent, fun di *keylim, fun di *malokhim, fun di *dayonim! same englen!
er lozt di mide oygn arop!
- take? - fregt er *mesupek un farshemt.
- zikher! - entfert fest der *av-bes-din!
zikher, zog ikh dir, az ales iz dayn.
ales in himl geher tsu dir! klayb un nem, vos du vilst, du nemst nor bay dir aleyn!
- take? - fregt Bontshe nokh a mol, nor shoyn mit a zikhern *kol.
- take! take! take! - entfert men im oyf zikher fun ale zaytn.
- nu, oyb azoy - shmeykhlt Bontshe - vil ikh take ale tog, in der fri a heyse bulke mit frisher puter!
*dayonim un *malokhim hobn aropgelozt di kep farshemt;
der *kateyger hot zikh tselakht.
