baym *goyses tsukopns

di *nevue fun shvartsaplen 16: baym *goyses tsukopns

nit keyn vayser *malekh dingt zikh mit a fintstern baym *goyses tsukopns, nor a man geknotn fun leym un erd farnemt a tsedriblte shtamlenish baym *goyses tsukopns.
di zun, di gildene pyavke, hot shoyn oysgezoygn dos geblit fun zayn *ponim.
s'gezegnt zikh Elye der koymen-kerer. zayne finger: ibergebrente shpendlekh vos haltn zikh bloyz mitn *koyekh fun zeyer ibergebrentkayt, sharn zikh un zukhn an onhalt iber di hent fun zayn eyntsikn fraynd.
- yingele, bist nokh alts nekhtn geboyrn gevorn, ha?
dos yingele iz atsind shoyn a zeyde. ober Elye der koymen-kerer iz der zelber vi yemolt: a *levone-geyer ibern shvartsn shney fun dekher-tsugefroyrn-tsu-dekher un ibern aksl oyf a shtrik - an emerl mit a nekhtn geboyrn yingele.
Elye der koymen-kerer hipert un blondzhet ibern shvartsn shney fun dekher mitn shtrik ibern aksl tsugebundn tsum emerl un ineveynik - a kind gezalbt mit sazhe.
untn zenen di moyern arumgetsoymt mit fayerdike ringen.
- yingele, bist nokh alts nekhtn geboyrn gevorn, ha?
der man fun erd un leym, vos farnemt baym *goyses tsukopns di tsedriblte shtamlenish, veys nit vos tsu entfern.
ober er veys, az Elye der koymen-kerer hot im aroysgetsoygn fun a koymen, gezalbt mit sazhe inem emerl, adurkhgerisn untn di fayerdike ringen un gebrakht tsu a poyerte, vu di gute froy hot im gehodevet in a shtal tsvishn vareme *beheymes.
- yingele, shlog mir in hartsn on *rakhmones - *al khet: vey, kh'hob gezindikt, kh'hob nit geratevet fun an ander koymen dayn shvesterl.
der man tsukopns kon shoyn atsind nit ayntsoymen dem galop fun zayn shtumikayt.
- Elye, host mir aleyn anustn dertseylt, az di dekher zenen geven glitshike shlangen.
bist aruntergefaln mit mir baynand un zikh tsekalyetshet.
kh'hob gehat *mazl.
bin geven arumgepantsert mitn blekh fun emerl.
vi azoy hostu yemolt gekent aroyftsien zikh oybn tsvishn di fayerdike ringen - untn?
- yingele, oyb azoy vel ikh mitnemen oyfn langn veg a *shayle: far vos iz dentsmol got nit geven a koymen-kerer?

  1986