6: di pulver-brigade

  di *nevue fun shvartsaplen 6: di pulver-brigade

  A

dos iz geshen in der kapoyerdiker tsayt, ven a heysherik iz bafaln mayn shtot.
un der heysherik hot nit gefresn un gekhromsket zangen un kraytekhtser, nayert yung un alt, *eyfelekh un *zkeynim.
un *akhuts fleysh un gebeyn iz im gegangen in toyt tsu tsezegn mit zayne zegtseyndlekh dem *kheylek in mentsh vos me ruft: *neshome.
dos iz far im geven der geshmakster *kheylek.
un yemolt, in an onheyb-harbstikn baginen, bin ikh gekhapt gevorn in mayn beydeml fun a *sheliekh funem heysherik, vos ersht nekhtn iz er geven a student in a vays hitele, mayner a *shokhn, un er un zayns glaykhn in droysn, hobn mikh ayngeshlosn in a sherenge durkh a gantser nakht tsunoyfgekhapte, un m'hot undz getribn gas-aroyf, gas-aroyf tsu di berg, vos heybn zikh on vu di gas endikt zikh.
bay di zaytn hobn shoyn klyonbeymer opgeshotn zeyere gele lates.
un dortn vu di gas endikt zikh, iz di sherenge vayter getribn un fartribn gevorn tsvishn tsvey berg, vu eyner *goylemt antkegn andern.
der boykh funem ershtn barg iz geven arumgegartlt mit shtekhldrot un gekreytste ayzns.
un bald hot zikh antplekt zayn ingeveyd: okopes arum heyln, festungen un ambrazurn, vos der gevezener hersher hot tsugegreyt tsu farteydikn di shtot.
di sherenge iz arayn in di okopes.
an ander *sheliekh funem ontsolikn heysherik iz aroysgekrokhn fun a heyl, in moyzn-groe galife-hoyzn, un gehaltn a kurtse *droshe far di tsunoyfgekhapte: *heyoys mir hobn ongetsundn a *milkhome tsu untertenikn di velt, muzn mir tayer atsind batsoln.
di ershte tsolung: aribertrogn oyf aksl un pleytse di gazbombes un shtinkbombes vos inem boykh fun dem-o barg -
oyfn andern barg, antkegn iber.

  B

der *shetekh tsvishn beyde berg, a vayle frier mit der hant tsu derlangen, hot zikh itster, unter der *mase fun di bombes, *guzmedik oysgetsoygn.
elehey di erd iz farvandlt gevorn in a teyg un zi iz oysgevelgert bizn horizont.
zayn ekselents mayn *goyrl hot atsind mir tsugeshpilt tsu marshirn in der pulver-brigade (azoy hot emets a nomen gegebn di sherenge) unter a lodung mit gazbombes.
kh'bin geven in mitn fun der pulver-brigade, vos hot zikh getsoygn porvayz.
mayn mitgeyer hot zikh gehoykert unter shtinkbombes.
kh'hob im opgemostn zaytik untern ershtn harbstregn fun shveys: a *ponim bavaksn mit a zilberlekher kropeve bashotnt fun a shtroyenem kapelyush - *lezeykher dem zumer.
di pensne mit a shnirl arum zayn linkn oyer vos fun mayn rekhter zayt.
mit zayn itlekhn shpan shpringen unter zayne pensne vi tsvey farlibte oyf a karusel (der grotesker farglaykh hot zikh oyfgehit in mir zint yemolt!).
ikh hob a *rege bafrayt mayn rekhte hant baym tsuhaltn di *mase un hob tsugekvetsht oyf mayn mitgeyers noz di pensne.
di pulver-brigade hot geshpant un gor nit ongehoybn tsu shpanen.
mit itlekhn trot foroys hot zikh a tsi geton der barg vos antkegn iber - hintervaylekhts.
unter demonisher muzik fun krekhtsndike beyner hob ikh geshlosn kantshaft mit mayn mitgeyer.
s'hot zikh genumen hipern tsvishn undz an opgehakt-sopendiker *shmues tsu fargesn undzer viste role un sara *mehalekh s'iz undz bashert aribertsushvimen durkh der trikenish, tsum gehoftn breg.
d"r Horatsi Dik, azoy heyst er mitn titl tsuzamen.
a psikhyater in a shpitol far *meshugoim.

  G

mir hobn beyde *moyre tsu kukn foroys.
d"r Horatsi Dik hot mer *mazl fun mir: zayne pensne zenen farklept gevorn mit a kley fun shtoyb-un-shveys un er zet *bemeyle nit vos er vil nit zen.
un mikh tsit alts shtarker aroyftsuheybn di blayene vies.
mayne oygn zenen gevorn alkoholiker un zey geyen *mamesh oys tsu trinken di reyne un shtarke spirt fun der luft.
s'hot zikh derhert an oyfrays.
emets fun di ershte in der pulver-brigade iz gefaln unter zayn *mase.
a fontan fun roytn roykh hot zikh a heyb geton ibern bloen layvnt fun horizont.
*beys der kleyner *mehume hot mayn mitgeyer kuntsik aropgeshundn fun zikh zayn popelyatn mantl.
der oyfrays hot im gegebn *koyekh ontsuhaltn di shpaneray.
d"r Horatsi Dik hot mir dertseylt zayn *yikhes: er iz an eynikl fun *Ayzik-Meyer Dik, *mekhaber fun hunderter *mayse-bikhlekh un romanen.
s'hot oysgezen umgleyblekh.
grod bin ikh bakant mit der biografye fun *Ayzik-Meyer Dik un s'zenen mir nit fremd zayne *mayses.
kh'hob gepruvt makhn a *yorn-kheshbn ven *Ayzik-Meyer iz geboyrn gevorn, hot *khasene gehat, geboyrn kinder un geshtorbn, un s'hot epes nit geshtimt der *kheshbn.
forshers funem romanen-shrayber hobn dakht zikh in ergets nit dermont, az in shtot hinyet zayner an eynikl.
- *efsher a *korev, tsi an ureynikl? - hob ikh gepruvt aropdingen dem *yikhes baym *khoshevn dokter.
mayn mitgeyer hot nit nokhgegebn: an eynikl.
er gedenkt *afile zayn zeydns vitsn un vertlekh.
ven Horatsi iz geven a *kheyder-yingl un hot geheysn Hirshke, hot er gehert funem altn zeydn aza vertl: shoyn tsayt tsu kayen di erd, nor nito keyn tseyn.
a durkhzeevdiker shmeykhl iz geblibn hengen iber zayn *ponim, vi shpinvebs antkegn zun.
vider iz emets fun der pulver-brigade gefaln unter zayn *mase, nor di *mase hot nit oyfgerisn.
un der antkegndiker barg iz mid gevorn fun sharn zikh hintervaylekhts un er iz geblibn *goylemen oyfn zelbikn ort vu nekhtn-eyernekhtn.
der *sheliekh fun heysherik in galife-hoyzn, hot farbaygetrasket oyf a mototsikl undzer pulver-brigade.
er hot geshosn iber di kep un tsvishn eyn por un der tsveyter.
un ven der bakoyvn fun der zun hot zikh aropgelozn iber undz nideriker, *kedey oystsubakn fun undzere layber *khale oyf *shabes, hot undz shoyn opgevart oyfn andern barg der zelbiker *sheliekh fun heysherik.
er iz geshtanen vi a strashidle bay a leymgrub, vos yorn-lang hot zi gekormet mit furlekh leym di arumike tsigelnyes.
in der leymgrub hot gekhorkhlt a shtilkayt.
mit purplnem trivaks oyf di shterns hobn dortn gedremlt eynike fun der pulver-brigade.
s'hot oysgezen: di leymgrub hot geboyrn di toyte.
un bay der leymgrub, vu mir hobn opgelodn di bombes, hot undz di bashefenish in galife-hoyzn a *sho opru geshonken.

  D

itster hob ikh gekent beser arumblikn mayn fraynd.
zayn *shaykhes tsu *Ayzik-Meyer Dik hob ikh bashlosn oystsuforshn an andersh mol.
(ikh hob gegleybt in tsayt).
un dervayle hob ikh opgerisn fun mayn hemd etlekhe pasn un tsugeton tsu zayne vundn.
ober d"r Horatsi Dik iz geven oyf mir *broygezlekh, vos ikh *sofek in zayn *eyniklshaft.
ikh hob ongeshpitst an oyer tsu zayn *loshn: daytshmerish, *Ayzik-Meyerish, vi ikh volt hern leyenen Diks *mayse-bikhl "*Khaytsikl aleyn" oder "di mentshn fun Duratshishok".
kh'hob im gefregt oys naygerikayt tsi er iz a hi-geboyrener, un oyb ye, *halemay zayn yidish iz alt-gebakn.
zayn entfer iz geven a zaytiker:
- ya, ya, in dizer shtot, kolega, hot *afile a *bod-goy geredt yidish mit a pare.
mayn mitgeyer un *mitgoyrlnik hot shoyn geredt vegn der shtot in fargangenhayt.
er hot ongetapt bay der leymgrub a zis bliml un zikh dermit otkhayet.
ikh hob nokh a mol bashlosn oyftsugern mit mayn *yikhes-griblenish.
bay der leymgrub iz alemens *yikhes der zelbiker.
d"r Horatsi Dik iz gevorn mit mir heymisher.
er hot gebitn di teme.
hot zikh ongelent oyf an elnboygn un mir dertseylt vegn zayner an iberlebenish in shpitol far *meshugoim: der dokter hot ayngefirt inem shpitol a *seyder, az di badinershaft zol nit genumen vern fun droysn, *mekhuts di vent fun shpitol, nor fun ineveynik, fun di tsedriblte *neshomes.
mer nokh: geven dortn a skhizofreniker, a dokter, vos baym heyln di *meshugoim hot er geheylt zikh aleyn. oykh der eyberkukher iz geven a patsyent fun shpitol.
in a sheynem tog, vi m'iz gevoynt tsuzogn, iz d"r Horatsi Dik *stam azoy arayn in kikh.
un do iz hinter im di tir farhakt gevorn.
der eyberkukher un zayne *meshorsim hobn im gebundn un dernokh hot der eyberkukher zikh tsu im dernentert mit tsvey lange mesers:
- ikh'l dir tseshnaydn un opkokhn.
eyn mol far ale mol veln mir hobn a geshmakn mitik.
zayn lebn iz gehangen oyf a *rege.
nor in der-o *rege hot er zikh dermont, az di *meshugas funem eyberkukher bashteyt in dem, az a *ganev hot *aroysgeganvet s'gantse zalts fun der shtot un on zalts hot nit keyn *tam s'esn.
*Ayzik-Meyer Diks eynikl hot oysgerufn: panye Hendeles - azoy hot geheysn der eyberkukher - vos iz mit aykh der mer, der mitik vet dokh zayn *legamre on zalts, on *tam, lozt mikh fray, vel ikh brengen a fuln hoyfn zalts.
un azoy iz d"r Horatsi Dik yemolt geratevet gevorn.
zayn oysfir: bloyz mitn gebn gerekht a *meshugenem, iz do a shans tsu antrinen fun zayne mesers.

  H

vider hot zikh geyavet bay der leymgrub der *sheliekh funem heysherik: di oprutsayt iz geendikt.
atsind badarfn mir loytn zelbikn *seyder - tsuriktrogn di bombes oyfn ort vu mir hobn zey genumen: hinter di drotgetsoymen antkegn iber.
un do hot plutsem laykht vi a foygl zikh a heyb geton d"r Horatsi Dik un kh'hob gezen un gehert zayn fayerdike *droshe farn *sheliekh fun heysherik: *heyoys vi mir, di tsunoyfgekhapte, hobn vedlik di reyd fun yenem ongetsundn a *milkhome tsu untertenikn di velt, un dervayle iz nokh nit klor ver di *milkhome vet gevinen, deriber ken im tayer kostn oyb er vet zikh iber undz izdyekeven - -
khotsh der dokter iz nit enlekh geven tsum kleynem *Dovid, un der *sheliekh fun heysherik - tsum gepantsertn *Golyes, dokh hobn di mentshn fun der pulver-brigade mitgeshpilt inem spektakl oyf lebn un toyt.
oykh di vos hobn gedremlt in leymgrub mit purplnem trivaks oyf di shterns, hobn ongeshpitst zeyere umlebedike oyern.
oykh di gazbombes un shtinkbombes, azoy hot zikh gedakht, vern a *tsad in umglaykhn farmest.
az d"r Horatsi Dik hot geendikt zayn *droshe, iz der *sheliekh fun heysherik shvarts un din gevorn vi an ibergebrente shvebele.
- ir zayt fray - hot er tsu undz a makh geton.
un er iz *nelem gevorn, s'iz nit geblibn fun im keyn dekh.
nor *leman hoemes un *leman hageshikhte, hobn mir yemolt nit gekent fray zayn, vayl di reyne onheyb-harbstike luft iz gehangen oyf a *tlie.

  1985

tsurik:  di *nevue fun shvartsaplen