*Khanike-likhtlekh

di *nevue fun shvartsaplen 2: *Khanike-likhtlekh

a por hundert a mol geboyrene mentshn, ale mit eyn *ponim, zenen mir gelegn in a gliderknoyl, vi eyn filoygike bashefenish, ibern bruk dem ayzikn fun Lukishker turme.
der plats - an *eymedik firkantiker shpigl ayngeremt in farkratevete moyern. un dort vu di moyern kumen zikh tsuzamen, iber sharf getesete vinklen, heybn zikh vekhters in shtolene helmen un zey lozn fun gumene kishkes, fun lange *Ashmeday-gorglen, blitsike vasershtromen in undz, iber undz, di a mol geboyrene mentshn.
zenen zey fayer-lesher, ver brent? keyner brent nit. ale frirn. un di klingendike shverdn fun di vasershtromen tantsn iber undzere nakete layber.
itster banemen shoyn di gefangene, az di fayer-lesher viln zey farfrirn. azoy hot a mol a vulkan zikh a shpil geton mit di mentshn fun Pompey; az baginen veln kumen tsu der oysshtelung oysderveylte gest, veln zey *hanoe hobn fun di ayzike skulpturn.
a froy mit a kind bay der brust iz shoyn bald farfroyrn. ir otem ibern otem funem kind - a roykhik dimentene toyb, vos hengt in der luftn iber a tsebrokhn eyele.
un ot iz a *kle-zmer mit a fidl untern kinbak. di strunes tsien zikh fun zayn fayerdiker bord. klangen - shney un ayz - badekn im. pavolye shtelt zikh op zayn fidl: a shif tsvishn kries.
ikh farnem opgehakte *koyles:
- *alemay iz der shney nit keyn tsiankali?
- un ikh zog aykh, brider, undz iz *mekane der bashefer.
- haynt iz *Khanike, s'finfte likhtl!
a *kol tsi a *bas-kl?
halb farfroyrene shvartsaplen, vu trern lakhn fun trern, zegn funander zeyere kratn un tsien zikh in der farmirmlter luft. zey zukhn dem *bas-kl un zey gefinen im:
finf brenendike finger vos a yid hot ongetsundn fun zayn eygener hant, finf *Khanike-likhtlekh, heybn zikh mit gildene tsingelekh iber di ayzike skulpturn. un zey tseshmeltsn zeyer ayzikayt un zey farbrenen di fayer-lesher un di farkratevete moyern.

1953

tsurik:  di *nevue fun shvartsaplen