*Mayses fun hintern oyvn 2: der *shoykhet

  1

*Yoyne Meir hot gezolt vern der Kolominer *rov.
der tate un der zeyde zenen beyde gezesn in Kolomin oyf der *kise rabones.
ober di Kuzmirer *khsidim hobn zikh gehat ayngeshpart dos mol nisht tsutsulozn a Trisker *khosid zol vern *more dasre (*rov in shtot).
di Kuzmirer hobn geshlosn *yad-akhes mit di Radziner.
zey hobn ibergenumen *kohol.
zey hobn untergekoyft dem povyatovi natshalnik un avekgeshikt a *mesire tsum gubernator.
nokh lange raysenishn hobn di Kuzmirer oysgefirt un arayngezetst zeyers a *rov.
*Yoyne Meir zol nisht blaybn on *parnose, hot men im oyfgenumen farn shtotishn *shoykhet.
ven *Yoyne Meir hot derhert dos vort *shoykhet, iz er gevorn nokh bleykher vi er iz.
er hot *getaynet, az *shkhite iz nisht in zayn *teve.
er iz veykhhartsik, kon nisht zen keyn blut.
ober ale hobn zikh oyf im ongezetst - di *parnosim, di sheyne yidn fun Trisker kloyz, der shver, *r' Gets Frampoler, Reytse Doshe dos vayb.
der nayer *rov, *r' *Sholem Leyvi Halbershtam, hot im oykh tsugeredt.
*r' *Sholem Leyvi, a sandzer eynikl, hot say-vi zikh geshrokn far der zind fun *hasoges-gvul (tsunemen bay yenem di *parnose).
*Yoyne Meir hot gehat a *khazoke.
*r' *Sholem Leyvi hot nisht gevolt der yungerman zol blaybn on broyt.
der Trisker *rebe, *r' *Yankev Leybele, hot geshribn *Yoyne Meirn a briv, az m'tor nisht hobn mer *rakhmones fun dem oybershtn.
ven m'shekht a *beheyme mit a *koshern *khalef un mit *kavone, iz men *mesakn dos *nefesh vos zitst in ir.
s'iz voyl bakant, az di *neshomes fun *tsadikim vern oft *megulgl in *beheymes, *oyfes, fish optsukumen far a *pegam.
nokhn *rebns briv hot *Yoyne Meir zikh untergegebn.
*heter-hoyroe hot er shoyn gehat fun lang.
itst hot er genumen knelen *Tvues shor, vi oykh di *dinim fun *shkhite in *yoyre-deye mitn *sha"kh, *Ta"z, *Peyre megodim.
der ershter *seif in *Tvues shor iz az a *shoykhet darf zayn a *yere-shomayim un *Yoyne Meir hot zikh arayngeton in yidishkayt mit mer fleys vi ale mol.
*Yoyne Meir, a kleynvuksiker, a darer, mit a blas *ponim, a pitsele gel berdele oyfn shpits kin, a krumer noz, an ayngefaln moyl un mit gele dershrokene oygn, ayngefast tsu noent eyns tsum andern, hot gehat a nomen mit zayn frumkayt.
er hot geleygt dray por *tfilin, *Rash"is, *rabeynu *Tams un *r' *Shrire *goens.
er hot bald nokh di kest ongehoybn fastn *taneysim un oyfshteyn tsu *khtsos.
dos vayb, Reytse Doshe, hot say-vi gebitert az *Yoyne Meir iz nisht-fun-der-velt.
zi hot zikh geklogt far der mamen, az er redt nisht oys tsu ir keyn vort, kukt nisht oyf ir *afile in di reyne teg, un az er gedenkt nisht di nemen fun di eygene tekhterlekh.
gekumen tsu ir iz er bloyz in der nakht, ven zi iz gegangen *tvile, eyn mol in *khoydesh.
ober zint er hot ayngevilikt tsu vern Kolominer *shoykhet, hot *Yoyne Meir genumen oyf zikh naye *khumres.
er hot gegesn alts veyniker.
er hot *kimat oyfgehert redn.
ven an oreman hot geefnt di tir, iz *Yoyne Meir im akegngelofn, im avekgegebn dem letstn groshn.
der *emes iz, az dos vern *shoykhet hot gehat arayngetribn *Yoyne Meirn in a *more-shkhoyre, ober zikh kegnshteln dem *rebn hot er nisht gevolt.
s'iz *avade azoy bashert, hot *Yoyne Meir bay zikh opgefast.
s'iz zayn *goyrl tsu farshafn *yisurim un tsu laydn *yisurim.
vifl *Yoyne Meir hot gelitn, hot men bloyz gevust in himl.

*Yoyne Meir hot zikh geshrokn, er zol nisht *avekkhaleshn baym shekhtn dos ershte *of, oder di hant zol im nisht a tsiter ton.
ergets vu hot er bagert s'zol geshen a *mikhshl.
dos volt fun im opgeton dem *rebns *gzeyre.
ober alts iz tsugegangen vi s'badarf tsu zayn.

a *sakh mol in tog hot *Yoyne Meir *ibergekhazert in gedank di eygene verter: m'kon nisht zayn derbaremdiker fun derbaremdikn.
di *toyre hot gezogt: וזבחת מבקרך כּאַשר צויתיך (du zolst shekhtn fun dayne rinder vi ikh hob dir gebotn).
m'hot gevizn *Moyshen oyfn barg *sinay di mustern fun *shkhite un *bdike.
s'iz alts *rozin derozin, dos lebn, der toyt, der mentsh, di *khaye.
yene vos m'shekht nisht, shtarbn say-vi fun alerley shlafkaytn, matern zikh oft vokhn un *khadoshim.
in di velder fartsukn di *khayes eyne di andere.
in *yam shlingt ayn eyn fish dem tsveytn.
dos Kolominer *hekdesh iz ful mit kriplen un geleymte, vos lign bazamen shoyn yorn un makhn unter zikh.
keyn *shum *ben-odem kon nisht farminern dem *tsar fun der velt.

fun destvegn hot *Yoyne Meir zikh nisht gekont tsugevoynen tsu der *shkhite, nisht gefunen keyn treyst.
yedes tsapl fun an *of hot aroysgerufn a tsaplenish in zayn, *Yoyne Meirs, ingeveyd.
dos shekhtn yede *dake, yede *gase (groyse un kleyne *beheymes) hot im vey geton, vi er volt geshnitn dem eygenem haldz.
fun ale shtrofn vos s'hobn gekont kumen oyf im, iz *shkhite di harbste.

s'zenen nokh nisht gehat ariber dray *khadoshim, vi *Yoyne Meir iz gevorn *shoykhet, ober di tsayt hot im oysgevizn oysterlish lang.
er iz gevorn vi ayngetunken in blut un eyter.
er hot *keseyder gehert dos kvakedike geshrey fun hiner, dos kreyen fun hener, dos godern fun gendz, dos gebril fun oksn, dos mekenish un bekenish fun tsign un kelber, farnumen a flatern fun fligl, a klapn fun kloen in dil.
di *gufim hobn nisht gevolt visn fun keyn *shum farentferung.
yeder *guf hot zikh geampert oyf zayn shteyger, gepruvt antrinen, un epes vi akegngeredt dem bashefer biz tsum letstn otem.
in im aleyn, *Yoyne Meirn, hobn geshturemt di *kashes.
tsvor, tsu bashafn di velt hot der *eyn-sof (di umendlekhkayt) gemuzt aynshrenken zayn likht.
s'kon nisht zayn keyn *bkhire on payn.
ober vi bald di *bale-khayim hobn nisht keyn *bkhire, far vos kumt zey tsu laydn?
*Yoyne Meir hot tsugezen a fartsiterter vi di *katsovim hakn di *beheymes mit hek un m'shindt di feln nokh eyder zey hobn oysgehoykht dem letstn otem.
bay di hiner hobn di vayber un moydn geflikt di federn eyder zey zenen oysgegangen.
s'iz ayngefirt, az der *shoykhet krigt di milts un di grobe kishkes fun yeder *beheyme.
*Yoyne Meirs shtub iz gevorn ful mit fleysh.
Reytse Doshe hot gekokht yoykhn in rizike tep vi keslen.
aleyn a groyse, a dike, hot zi gehat nokh finf shvester, ale parshoynen vi zi.
*Yoyne Meirs tekhterlekh zenen, *a ponim arayngerotn in der muter.
zey zenen zikh tsevaksn in der breyt.
in der geroymer kikh hot men gehaltn in eyn kokhn, brotn, preglen, bakn, mishn mit kokhlefl, shoymen mit shoymlefl.
Reytse Doshe hot shoyn vider getrogn un der boykh irer hot aroysgeshtartst mit a shpits.
di shvester hobn mitgenumen aher dos kleynvarg.
di shviger, Reytse Doshes muter, hot gebrakht yedn tog alerley gebekser un derkvikenishn.
a *nekeyve tor nisht lozn hern ir *kol, ober Reytse Doshes dinst, a tokhter fun a vaser-treger, hot gezungen lider, arumgetshapet a borvese, mit tselozte hor, gelakht, az s'hot opgehilkht in ale *khadorim.

*Yoyne Meir hot gevolt antloyfn fun dem *gashmies, ober dos *gashmies iz im nokhgelofn.
geblibn dort shtekn.
er hot gepruvt zikh fargesn in *toyre, ober s'iz im letstns oyfgefaln, az di *toyre aleyn iz oykh ful mit erdishe *inyonim.
er hot zikh arayngelozt in *kabole, ober er hot voyl gedenkt, az far di fertsik yor darf men zikh nisht fartifn in di farborgenishn.
er hot fun destvegn nisht oyfgehert bletern in *Mishnes khsidim, in *Pardes, in *seyfer yetsire, in *Eyts-hakhayim.
dort, in di *oylomes ilyoynim (di hoykhe sfern) iz nishto keyn toyt, keyn *shkhite, keyn veytokn, keyn vampn un pontsn, keyn hertser un lung-un-lebers, keyn *sirkhes un keyn *tarfes.
teyl mol bay nakht iz *Yoyne Meir tsugegangen tsum fentster, aroyfgekukt in himl.
di *levone hot farshpreyt a loyterkayt.
di shtern hobn geblitst un geblintslt yeder mit zayn himlishn *sod.
ergets iber dem *oylem haasie, hekher fun di *mazoles zenen arumgefloygn *malokhim, *srofim, *oyfanim, *khayes hakoydesh.
in *gan-eydn hot men antplekt di *neshomes *soydes hatoyre.
yeder *tsadik hot gearbt dray hundert un tsen veltn, geflokhtn kroynen tsu der *shkhine.
vos neenter tsum *kise koved, alts heler di likhter, di loyterkaytn, alts knaper di *klipes.

*Yoyne Meir hot voyl gevust, az m'tor nisht betn oyf zikh dem toyt, ober er hot tif in zikh gegart nokhn *sof.
er hot gekrogn a viderviln tsum layb.
er hot *afile mer nisht gekont geyn in *mikve tsvishn yidn.
hinter ale hoytn hot gerizlt blut.
yeder haldz hot dermont *Yoyne Meirn on a meser.
mentshn vi *beheymes, hobn lendn, baykher, odern, gederem, zodiks.
s'iz genug tsu ton a fidl mitn *khalef di dozike yuste *balebatim zoln avekfaln vi di oksn.
vi zogt di *gmore?
כּל העומר להשׂרף כּנשׂרף דמי (alts vos iz ongebreyt tsu vern farbrent, iz shoyn vi farbrent), vi bald der *takhlis fun a mentsh iz foylekhts, verem, geshtank, iz er shoyn foroys a shtik *gesrokhe.
*Yoyne Meir hot ersht itst banumen far vos di fartsaytike *pilusufim hobn farglikhn dem kerper tsu a shtayg, a *tfise, vu di *neshome zitst gefangen un kon zikh koym dervartn m'zol zi aroyslozn oyf der fray.
er hot ersht rekht farshtanen dem meyn fun der *gmore: טובֿ מאוד זה המוות (zeyer gut, dos iz der toyt).
nu, ober aleyn tor men zikh fun gefengenish nisht aroysraysn.
m'muz vartn biz der vekhter bindt oyf di keytn, efnt dos toyer...
*Yoyne Meir hot zikh umgekert tsum geleger.
er iz a lebn lang geshlofn oyf an unterdek, unter an iberdek, ongelent dem kop oyf a kishn.
itst iz im oyfgefaln, az er shpart zikh on oyf federn, pukh, opgeshlisn fun *oyfes.
in andern bet, lengoys *Yoyne Meirs, hot Reytse Doshe geshnorkht.
fun mol tsu mol hobn di nozlekher ire aroysgelozt a fayf.
oyf di lipn hot zikh epes vi geblezlt.
*Yoyne Meirs tekhter hobn gehaltn in eyn geyn tsum pomeshaf.
di borvese fis hobn gepatsht ibern dil.
geshlofn zenen zey eyne mit der anderer un s'hot getrofn, az zey hobn zikh geshushket halbe nekht, gekhikhet.
*Yoyne Meir hot gelekhtst nokh zin vos zoln lernen *toyre, ober Reytse Doshe hot geboyrn eyn meydl nokhn andern.
vi lang zey zenen nokh geven kleyn, hot *Yoyne Meir zey teyl mol gegebn a knip in bekl.
ven er iz gegangen oyf a *bris, hot er zey aheymgebrakht a shtikl reshinke.
a mol hot er *afile geton a kleyner moyd a kush in kepl.

ober itst zenen zey gehat oyfgevaksn.
Reytse Doshe hot zikh geklogt, az zey esn tsu fil un vern tsegosn.
m'hot genasht fun di tep.
der elterer, *Rokhlen, hot men shoyn batsaytns geredt a *shidekh.
do hobn di moydn zikh gekrigt, zikh gezidlt;
bald hobn zey eyne der anderer gekemt di hor, geflokhtn tsep.
m'hot nayert geplaplt fun kleyder, shikh, zokn, koftlekh, maytkes.
m'hot geveynt un gelakht.
m'hot zikh geloyzt, zikh geshlogn, zikh gevashn, zikh gekusht.

ven *Yoyne Meir flegt zey pruvn zogn *muser, flegt Reytse Doshe a geshrey ton:
- mish dikh nisht arayn!
loz di kinder gemakh!...
oder zi hot a geshrey geton:
- beser ze di tekhter zoln nisht arumgeyn naket un bloyz!...
vos broykhn zey azoy fil?
vos darf men dos layb azoy fil hiln un bashoynen? - hot *Yoyne Meir zikh gefregt.

vi lang er iz nisht geven keyn *shoykhet, flegt er zeltn blaybn in shtub.
er hot rekht nisht gevust vos s'tut zikh dort.
ober itst iz er gevorn a shtubzitser, tsugezen di oyffirung.
di moydn zenen avek kloybn yagdes, shvomen, zikh getrofn mit tekhter fun proste hayzer.
m'hot ongebrakht gantse koybers trukene tsvaygn.
Reytse Doshe hot gepreglt ayngemakhts.
shnayders zenen gekumen nemen dem gezindl a mos.
shusters hobn gemostn di fis.
Reytse Doshe un di shviger hobn shoyn batsaytns zikh geshpart vegn *Rokhls, der elterers, oysshtayer.
*Yoyne Meir hot gehert reyd vegn a zaydn kleyd, a sametn kleyd, alerley shubes, yupitses, futers.
itst, az er iz gelegn vakh, hobn di ale verter vider im opgehilkht in di oyern.
m'hot zikh nokhgegebn dem voyltog derfar, vayl, er, *Yoyne Meir, iz gevorn a fardiner.
ergets in Reytse Doshes ingeveyd hot gehoyert a nay kind, ober *Yoyne Meir hot geshpirt bashaymperlekh, az s'vet vider zayn a *nekeyve...
- nu-nu, alts vos m'git in himl darf zayn ongeleygt - hot *Yoyne Meir zikh aleyn gevornt.
er hot zikh tsugedekt, ober s'hot im bashlogn a hits.
dos kishn untern kop iz gevorn oysterlish hart, vi tsvishn di federn volt gelegn a shteyn.
er, *Yoyne Meir, iz aleyn oykh *guf: fis, a boykh, a hartsbretl, elnboygns.
s'hot im gegrimt in di gederem.
s'hot im getriknt in gumen.
*Yoyne Meir hot zikh oyfgezetst.
- tate in himl, s'iz mir eng!...

  2

*Elel iz a *khoydesh fun *tshuve.
frierdike yorn flegt der *Elel brengen mit zikh gelaytertkayt.
*Yoyne Meir hot gern gehat di kile vintlekh vos blozn on fun vald, fun di opgeshnitene felder.
er hot gekont lang gafn oyfn blas-bloyen himl mit di shitere volkndlekh, vos hobn im dermont in dem flaks vu s'ligt ayngebet an *esreg.
in der luft zenen arumgeshvumen shpingevebn.
oyf di beymer zenen di bleter gevorn gel vi zafren.
in dem tsvitshern fun di feygelekh hot zikh gehert a *yomim-neroimdike benkshaft un *kheshbn-hanefesh.
ober gor epes andersh iz der *Elel far a *shoykhet.
oyf *rosh-heshone iz di *shkhite a groyse.
*erev yom-kiper shlogt yeder yid *kapore.
in ale heyflekh hobn shoyn batsaytns gekreyet hener un s'hoben gekvoket di hiner vos m'darf avekleygn *erev yom-kiper.
dernokh kumt *sukes, *hoshayne-rabe, *shmine-atseyres, *simkhes-toyre, *shabes-breyshes.
yeder *yom-tev hot gebrakht zayn *shkhite.
*mile-milyasn *oyfes un rinder, vos hobn itst gelebt, zenen shoyn foroys *farmishpet tsum toyt.
*Yoyne Meir hot in gantsn oyfgehert shlofn in di nekht, ven er hot shoyn ayngedrimlt, zenen im bafaln forkhtike *khaloymes.
di *beheymes hobn gekrogn a geshtalt fun mentshn, mit berd, *peyes, kolpakes iber di herner.
er, *Yoyne Meir, hot geshokhtn a kalb, ober s'iz gor geven a meydl.
zi hot gefokhet mitn haldz, zikh gebetn m'zol zi rateven.
zi iz gelofn in *bes-medresh aynraysn un fargosn dem shulhoyf mit blut.
eyn mol hot zikh *Yoyne Meirn oysgevizn, az onshtot tsu shekhtn a shof, hot er gekoylet Reytse Doshen.
an ander mol iz fun a gekoyletn bok aroys a mentshlekh *kol.
der bok iz geshokhtenerheyt akegngeshprungen *Yoyne Meirn, gepruvt im shtoysn, gesholtn oyf *loshn-koydesh, in *gemore-loshn, oyf im geshpign, geshoymt.
*Yoyne Meir iz oyfgekumen a bagosener mit angstn.
a hon hot geton a krey vi a glok.
andere hener hobn im opgeentfert, vi a *khazn mit a *kohol.
*Yoyne Meirn hot zikh oysgedukht, az di *oyfes fregn *kashes, firn a *vikuekh, yomern tsuzamen oyfn *gzar vos kumt oyf zey.
*Yoyne Meir hot nisht gekont aynlign.
er hot zikh oyfgezetst, zikh ongenumen bay di *peyes, zikh geshoklt.
Reytse Doshe hot zikh ibergevekt.
- vos iz, ha?
- gornisht, gornisht.
- vos shoklstu dikh?
- lomikh gemakh.
- varfst on oyf mir a *pakhed!

nokh a vayl hot Reytse Doshe tsurik zikh tsekhropet.
*Yoyne Meir iz arop fun geleger, gevashn negl-vaser, zikh ongeton.
er hot gevolt aroyfleygn ash oyfn shtern, oprikhtn *khtsos, nor di leftsn hobn zikh im nisht geleygt tsum zogn di heylike verter.
vi kon er klogn oyfn *khurbn *beys-hamikdesh az do, in Kolomin, greyt zikh a *khurbn un er, *Yoyne Meir, iz der *Tites, der *Nevuzrodn!

in shtub hot di luft geshtikt - geshmekt mit shveys, fets, koytike vesh, *hashtone.
eyn meydl hot gepreplt in shlof, di andere hot gekrekhtst.
di betn hobn geskripet.
di almers hobn geshorkht.
in kotukh, unter dem oyvn, zenen gezesn di *kapores, vos Reytse Doshe hot ayngeshpart oyf *yom-kiper.
*Yoyne Meir hot farnumen a kratsn fun a moyz, a griltsn fun a gril.
es hot zikh im gedukht, az er hert vi verem boyern di balkns, dem dil.
umtsolike *bruim hobn arumgeringlt dem *ben-odem, yedes mit zayn natur, mit zayn *tvie tsum bashefer.

*Yoyne Meir iz aroys in heyfl.
do iz alts kil un frish.
toy iz gefaln.
in himl finklen di mitnakhtike shtern.
*Yoyne Meir hot tif ayngeotemt.
er iz gekrokhn tsvishn faykhte grozn, bleter, kustn.
di zokn zenen im gevorn nas iber di latshn.
er iz tsugekumen tsu a boym, zikh opgeshtelt.
tsvishn di tsvaygn hobn, vayzt oys, gehangen nestn.
er hot farnumen a tsvitshernish fun yunge un ibergevekte feygelekh.
fun gemoyzekhts hintern barg hot zikh dertrogn a kvaken fun fresh.
- zey shlofn gornisht, di fresh? - hot *Yoyne Meir zikh gefregt. - zey hobn gor *koyles fun manslayt...
zint *Yoyne Meir hot ongehoybn shekhtn, hot zikh zayn gedank gedreyt arum di bashefenishn.
er hot zikh gegriblt in alerley *khkires.
fun vanen shtamen di flign?
vern zey geboyrn fun der mames boykh, oder vern zey oysgebrit in eyelekh?
un vi bald ale flign shtarbn oys in vinter, vu nemen zikh zumer naye?
nu, un di sove vos hoyzt oyfn shuldakh, - vos tut zi in di frest?
blaybt zi do?
flit zi avek in di vareme lender?
un vi kon men lebn in droysn ven s'glit der frost un m'kon zikh koym dervaremen untern iberbet?
an umbakante libshaft hot ongenumen *Yoyne Meir tsu alts vos krikht un flit, vimlt un vidmet zikh.
nu, un *afile di mayz, - vos iz dos zeyer shuld vos zey zenen mayz?
vosere *aveyres tut den a moyz?
alts vos zi vil, iz a shtikl broyt, oder apitsl kez.
oyb azoy, - far vos iz ir di kats aza *soyne?

*Yoyne Meir hot zikh gevigt in der fintsternish un epes in im hot geklemt.
der mentsh kon nisht un tor nisht hobn mer *rakhmones fun dem har fun der velt, ober er, *Yoyne Meir, vert fartsert fun derbaremdikayt.
vi kon men betn oyf a lebedik yor, a gut kvitl, *beys m'roybt tsu bay andere dem *ruekh-khayim?
s'iz ayngefaln *Yoyne Meirn, az *afile *Meshiekh kon nisht oysleyzn di velt, vi lang s'geshet umrekht di *bale-khayim.
*al-pi yoysher voltn ale gedarft oyfshteyn *tkhies-hameysim: yedes kalb, yeder fish, yeder muk, yedes babele.
*afile in a vorm in der erd tliet a *nitsets-eloykim (a getlekher funk).
ven m'shekht a bashefenish, shekht men got...

- oy, vey, kh'ver *meshuge! - hot *Yoyne Meir gemurmlt.
a vokh far *rosh-heshone hot zikh ongehoybn dos gedikhte shekhtenish.
a gantsn tog iz *Yoyne Meir geshtanen bay a grub, geshokhtn hiner, hener, gendz, katshkes.
di *nekeyves hobn zikh geshutpt, geranglt, gevolt vos gikher tsukumen tsum *shoykhet.
andere hobn zikh gevitslt, gelakht, gegebn ontsuherenishn.
federn zenen gefloygn.
der hoyf iz gevorn ful mit kvokenish, godernish, henerish geklog.
fun mol tsu mol hot an *of aroysgelozt a geveyn fun a mentsh.
*Yoyne Meir iz gevorn ful mit grimenish.
er hot biz itst zikh getreyst, az er vet zikh tsugevoynen glaykh vi ale andere *shokhtim;
nor dos mol hot er gevust, az ven er zol *afile shekhtn hundert yor durkh anand, vet dos badrengenish nisht oyfhern.
di kni hobn im geshtroykhlt.
der boykh hot zikh im ongeblozn.
in moyl zenen ongekumen *umbatamte vasern.
Reytse Doshe un di shvester ire hobn zikh do oykh geporet, *geshmuest mit di vayber, gevuntshn yeder a *ksive toyve un m'zol derlebn iber a yor.
*Yoyne Meir hot shoyn *moyre gehat, az er shekht nisht loytn *din.
do iz im gevorn shvarts farn blik un do goldik-grin.
er hot gehaltn in eyn firn di sharf ibern nogl fun vayzfinger, tsi s'iz nishto keyn *pegime.
yede fertl *sho iz er avek *mashtn zayn.
komares hobn im gebisn.
kroen hobn oyf im gekraket fun di tsvaygn.
er iz azoy opgeshtanen biz zunzetsung.
dos grub iz gevorn ful mit blut.
nokh *Minkhe-Mayrev hot Reytse Doshe oyfgegebn *Yoyne Meirn kashe mit gedushekhts.
ober vi voyl er hot gornisht farzukht fun in der fri on, hot er nisht gegesn dos nakhtmol.
der haldz hot zikh im tsunoyfgedrikt, in der shlung hot zikh im avekgeshtelt a knoyl un er hot koym aropgeshlungen dem ershtn bisn.
er hot geleyent di *Krishme fun *Ar"i, gezogt *vide, zikh geklapt in harts vi a *shkhiv-mera (a geferlekh shlafer).

*Yoyne Meir hot gerekhnt, az er't haynt oykh nisht konen aynshlofn, ober azoy vi er hot ongelent dem kop un gezogt *hamapl, zenen im di vies tsugefaln.
s'hot zikh im gedukht az er *badknt a rind, trent oyf dem trelbukh, rayst aroys di *reye, blozt zi on.
vi kumt es?
dos tut dokh geveyntlekh der *katsev, hot *Yoyne Meir zikh gevundert.
di lung iz gevorn alts greser, zikh oysgeshpreyt ibern gantsn tish, aroyfgekvelt tsum balkn.

er, *Yoyne Meir, hot oyfgehert blozn, ober di lapn zenen gevaksn fun zikh aleyn.
der klenster lap, der yeniker vos men ruft der *ganev, hot zikh geshoklt, gevorfn, gepruvt zikh opraysn.
mit a mol iz fun gorgl aroys a fayfenish, a hustenish, a yomerlekh gebrum.
a *dibek hot genumen redn, shrayen, zingen, shitn mit *psukim, *gmores, shtiker *zoyher.
di lung hot zikh gelozt flien, patshn mit di lapn vi mit fligl.
er, *Yoyne Meir, hot gevolt antloyfn, ober nay der ofener tir hot geloyert a shvartser oks mit royte oygn un shpitsike herner.
er hot gepraykht, tseefnt a pisk mit lange tseyn...

*Yoyne Meir hot geton a tsiter, zikh ibergevekt.
dos layb hot zikh gebodn in shveys.
dos sheydl hot im oysgevizn geshvoln un vi ongefilt mit zamd.
di fis zenen gelegn oyfn shtroyzak shver vi heltser.
er hot zikh fun destvegn geshtarkt un zikh oyfgezetst.
er hot ongeton dem shlofrok, iz aroys in droysn.
di nakht hot geglivert a shvere, a toybe, an ongelodene, mit der fintsternish fun far zunshprots.
fun mol tsu mol hot zikh dertrogn fun ergets a hoykh, vi a zifts fun an umgezeenem.
a shoyder iz durkhgelofn *Yoyne Meirn durkhn rukn, a zig-zagishe hor.
epes in im hot geveynt un geshpet: nu, un az der *rebe heyst, iz vos?
- hot er tsu zikh geredt. - un *afile ven der *reboyne shel oylem zol heysn, iz *ma rash?
kh'vil nisht keyn *oylem-habe!
kh'broykh nisht keyn *gan-eydn, keyn kinder, keyn shver-un-shviger.
zol men mikh leygn oyfn shtekhbetl.
zol men mikh varfn *kaf-ekale.
kh'bin dir *moykhl, got, ale dayne *khsodim!
kh'tsiter mer nisht far dayn *unsane toykef!
kh'bin a *poyshe yisroel, a *mumer lehakhes! - hot *Yoyne Meir geshrign. - kh'hob in zikh mer *rakhmones fun *reboyne shel oylem, mer, mer!
er iz an *akhzer, an *ish milkhome, an *eyl kone venoykem.
kh'vil im nisht dinen.
s'iz *hefker a velt!...
*Yoyne Meir hot gelakht, ober fun di oygn zenen gerunen trern, gefaln in briendike tropns.
*Yoyne Meir iz arayn in kemerl, vu er halt di *khalofim, dem shlayf-shteyn, dos *moyhel-meser, alts tsunoyfgenumen, arayngevorfn in grub fun optrit.
er hot zikh opgegebn a *kheshbn, az er lestert, farshvekht *kle-koydesh, iz *meshuge, ober *Yoyne Meir hot mer nisht gevolt zayn *meyushev.
er iz aroys in droysn, zikh gelozt shpanen tsum taykh, tsu der brik, tsum vald.
*tales-utfiln?
kh'broykh nisht keyn *tales-utfiln! - hot er zikh aleyn geentfert. - der parmet iz opgeshundn fun a *beheyme.
di *batim zenen kelberne.
di *toyre aleyn iz fun fel.
s'iz alts geboyt oyf *shkhite.
foter in himl, bist a *shoykhet! - hot a *kol gehoylt in *Yoyne Meirn, - bist a *shoykhet un a *malekh-hamoves!
di gantse velt iz eyn shekht-hoyz...
a latsh iz aropgefaln *Yoyne Meirn fun fus, ober er hot im gelozt lign, geshpant vayter in eyn latsh un mit eyn zok.
er hot genumen rufn, shrayen, zingen.
kh'makh mikh *meshuge, hot er getrakht, ober dos aleyn iz a *simen fun a *khoser-deye...
er hot gehat geefnt a tirl in di gehirn un dos *meshugas iz arayngeflosn, alts farfleytst.
fun *rege tsu *rege iz *Yoyne Meir gevorn alts vidershpeniker.
er hot gerisn shtiker fun der zhupitse.
er hot aropgerisn dos kapl fun kop.
er hot a khap geton a *tsitse, zi opgeflikt tsuzamen mit a shtik *tales-kotn.
a *gvure iz im bafaln, di hoferdikayt fun eynem, vos hot aropgeshleydert fun zikh ale yokhn.
hint hobn im nokhgeyogt mit a bileray un er hot zey opgetribn.
tirn hobn zikh oyfgepralt.
manslayt zenen aroys borves, in farfederte yarmulkes.
vayber hobn zikh bavizn in unterkleyder un shlofkopkes.
ale hobn epes gerufn, gepruvt im farshteln dem veg, ober *Yoyne Meir hot zey oysgemitn.
emets iz avek onzogn di *katsovim, az *Yoyne Meir iz fun zinen arop.
zey zenen gekumen tsu loyfn mit shtekns un shtrik, ober *Yoyne Meir iz shoyn gehat ariber di brik, geaylt iber di opgeshnitene felder.
er iz gelofn un gebrokhn.
er iz gefaln un zikh oyfgehoybn, a tseshtokhener fun dem sharfn shtroy.
pastekher vos pashen ferd a gantse nakht hobn gelakht fun im, nokhgevorfn ferdmist.
di *beheymes oyf der pashe hobn zikh gelozt nokh im.
gleker hobn geklungen vi in a *sreyfe.
*Yoyne Meir hot farnumen gevaldn, a tupenish fun fis.
di erd iz gevorn *meshupe un *Yoyne Meir hot zikh gekoylert barg arop.
er hot gehat dergreykht dem vald, gehipert iber kishns mokh, shteyner, rizldike vaserlekh.
*Yoyne Meir hot gevust dem *emes: s'iz nisht keyn vaser, nor a blutiker zump.
fun der zun iz gerunen blut, oysgeshmirt di shtamen.
fun di tsvaygn hobn aropogehangen kishkes, lebers, miltsn, nirn.
preydiks hobn zikh oyfgeshtvelt oyf di fis, geshpritst oyf im mit gal, koyt, shleym.
*Yoyne Meir hot nisht gekont antrinen.
*mile-milyasn *beheymes, *oyfes hobn im arumgeringlt, greyt tsu nemen *nekome far yedn shnit, far yedn *pegam, far yedn ibergeshnitenem *veyshet, far yeder oysgetsupter feder.
azoy vi di gorglen hot geblutikt, azoy hobn zey gezungen:
- הכּל שוחטין ושחיטן כּשרת (ale megn shekhtn un zeyer *shkhite iz *kosher)...
*Yoyne Meir hot mer nisht gebroykht makhn dem onshtel.
er hot oyfgehoybn a foyst tsum himl:
- *gazlen! *retseyekh! *dov-shikl (fartsukndiker ber)!...
un er iz zikh fargangen in a *yelole, vos hot opgehilkht mit a *sakh *viderkoyles.
tsvey teg hobn di *katsovim im gezukht, ober m'hot im nisht gefunen.
mit a mol iz Zaynvl fun der vasermil gekumen in shtot mit der gehalisher *bsure, az *Yoyne Meir iz kapoyrgekumen in taykh nebn der shluze - a dertrunkener.
*khevre-kdishe iz glaykh avek brengen dem *bar-menen.
s'zenen geven a *sakh *eydes, az *Yoyne Meir hot zikh oyfgefirt vi a *meturef un der *rov hot *gepasknt, az der *nifter iz nisht geven keyn *meabed atsme ledas (a zelbstmerder).
m'hot *metaher geven dem *mes, im opgegebn a *karke nebn dem tatn un zeydn, der *rov hot gemakht a *hesped.
*makhmes der *yom-tev hot zikh ongerukt un Kolomin hot gekont blaybn on fleysh, hot *kohol aroysgeshikt tsvey *meshulokhim m'zol brengen oyf der gikh a nayem *shoykhet.