*Mayses fun hintern oyvn 6: der seans

  1

s'iz geven in zumer 1946.
in der mrs. Kopitskis living-rum, oyf Tsentral-Park-Vest, hot geglimert an eyntsik royt lempl hinter an abazhur bamolt mit der mrs. Kopitskis oytomatishe tseykhenungen: kaylekher mit oygn, blumen mit mayler, bekhers mit finger.
der gantser zal iz geven bahongen mit Lote Kopitskis bilder - ale gemolt in trans, *beys Lote Kopitskis kerper vert bahersht fun ir "kontrol", Bhagavar Krishna, an indisher *khokhem, vos zol hobn gelebt in fertn yorhundert.
dos hot er, Bhagavar Krishna, gemolt di pave mitn goldenem ek, vos hot in mitn dos geshtalt fun Buda; di nisht-veltishe beymer, bahongen mit koltanes un fantastishe frukhtn; di yungfroyen fun planet Venus, vos di hent zeyere zenen oysgeshpreyt vi tsvaygn un fun di oyern tsien zikh zilberne netsn - organen fun helzeeray.
di molerayen, dos alte mebl, di fakhn mit bikher, - iber alts hobn gehoyert roytlekhe shotns.
iber di fentster hobn gehongen gardinen.
bay a kaylekhik tishl, vos s'iz gelegn deroyf an uidzha-tovl, a shpiltsayg-trumeyterl un a farvelkte royz, iz gezesn dr. *Zorekh Gombiner, a nideriker, a breytbeyniker, mit a goln sharbn fun fornt un mit a shoyber hor fun hintn, halb-gel, halb-groy.
bremen hot er oykh gehat gele, bershtldike, un s'hobn afergekukt fun hinter zey a por broyne oygn, kleyne un shpizldike.
dr. Gombiner hot *kimat nisht gehat keyn haldz.
der kop iz gezesn oyf breyte akslen.
a noz hot er gehat a krume, tsugeplatsht baym vortsl un tseteylt baym shpits.
oyfn kin hot geshprotst a pitsele onvuks, vos s'iz shver geven tsu visn tsi dos iz a reshtl fun a bord, oder glat a vortsl hor.
dos *ponim iz geven tsekneytsht, shlekht-razirt un epes vi koytik.
er hot getrogn a shvarts rekl, a vays hemd mit flekn un an oysbinder vos iz gezesn in der krum.
dr. Gombiner hot geredt tsu der mrs. Kopitski in an oysterlishn gemish fun yidish mit daytsh.
- vos doyert es haynt zo lang?
vu izt unzer fraynd Bhagavar Krishna?
farblondzhet ergets in di himlishe sfern?
- dr. Gombiner, yagn zi mikh nisht - hot di froy Kopitski geentfert in dem zelbn daytshmerish. - men kon zey nisht gebn keyn orders...
zey hobn zeyre urzakhn un kaprizn...
zi muzn habn a kapele geduld...
dr. Gombiner hot genumen poykn mit di kurtse finger in tish.
oyf yedn finger hot geshprotst a royt berdele.
di mrs. Kopitski hot ongeshpart dem kop oyfn oysbet fun fotel, tsugeshlosn di vies, gevart arayntsufaln in trans.
kegn der tunkeler shayn fun roytn likht hot men gekont untersheydn di frish gefarbte hor, mat-shvarts un gekrayzlt, dos geruzhete *ponim mit der breyter noz, di hoykhe kinbakn, dos aroysshtartsndike moyl, di vayt fanandergerukte oygn ongeshmirt mit maskara.
dr. Gombiner flegt zikh vitslen, az zi zet oys vi an opgefarbter mops.
der man irer, der dentist Leon Kopitski, iz gehat geshtorbn mit a yor akhtsn tsurik, hot nisht ibergelozt keyn kinder.
di *almone hot zikh oysgehaltn fun a yerlekher pensye, vos zi hot bakumen fun an asekuratsye-gezelshaft.
in 1929 hot zi gehat farloyrn a farmegn in aktsyes oyf Vol-Strit, ober zi hot letstns fun s'nay ongehoybn ayntsukoyfn aktsyes un vertpapirn, loyt di onvayzungen fun uidzha-tovl un fun a kristal.
di froy Kopitski hot *afile fun tsayt tsu tsayt gefregt bay Bhagavar Krishna *eytses vegn shpiln oyf ferdlekh.
in etlekhe faln hot der indisher *khokhem ir antplekt oyf der vor oder in *kholem dem nomen fun dem ferd vos vet gevinen...
dr. Gombiner hot itst aropgelozt dem kop, aroyfgeleygt di hant oyfn shtern.
er hot halb-getrakht, halb-gemurmlt - vi s'iz der shteyger fun yene vos lebn aleyn un zenen gevoynt tsu redn tsu zikh.
- nu, genug zikh tsum nar gemakht.
haynt vet shoyn zayn s'letste mol.
kreplekh vern oykh tsugegesn...
- zi haben epes gezagt?
- ha? neyn.
- az ir aylt zikh, kon ikh nisht araynfaln in trans.
- trans-shmans - hot dr. Gombiner gemruket in zikh. - der gayst hot zikh farshpetikt, dos alts. - gezogt hot er:
kh'ayl zikh nisht.
kh'hob tsayt.
oyb der Amerikaner iz gerekht, az tsayt iz gelt, bin ikh eyn tsveyter Rokfeller, khe-khe-khe.
di froy Kopitski hot geefnt dos moyl tsu entfern.
der toplkin hot genumen tsitern mit ale zayne vortslen.
zi hot oyfgedekt a kastn falshe tseyn.
mit a mol hot zi geton a farvarf dem kop un iz arayngefaln in trans.
a zifts hot zikh fun ir aroysgerisn.
zi hot geton a khorkhl un a shnorkh.
dr. Gombiner hot gegaft oyf ir, fregndik, troyerik, *farkhidesht.
er hot nisht farnumen keyn *shum shorkh fun der droysntir, ober di mrs. Kopitski hot *a ponim gehat a geher fun a *khaye.
dr. Gombiner hot genumen raybn di shleyfn, di noz, zikh ongenumen baym pitsele berdl.
s'iz geven a tsayt, ven er hot gepruvt ale zakhn farshteyn mitn *seykhl, ober yene epokhe iz shoyn lang bay im gehat ariber.
er hot gehat oyfgeboyt an anti-ratsyonalistishe filozofye, a sort hedonizm, a gloybn in glik, vos hot avekgeshtelt seks vi di zakh-in-zikh un dem *seykhl - vi di niderikste shtufe fun denken, di entropye (fananderfalung) fun lebn, vos firt tsum endgiltikn toyt.
dr. Gombiner hot gehat oyf an oysterlishn shteyger kombinirt Hartmans ideen vegn dem umbavustn mit der *kabole.
vu alts iz baheftung, alts iz tsunoyfporenish fun er un zi, fun atom bizn absolut.
take tsulib dem dozikn sistem iz er gekumen in 1939 fun Pariz keyn Amerike, ibergelozt in Poyln a tatn a *rov, a vayb vos hot im nisht gevolt *getn un a gelibte Nela, a dikhterin, vos er hot mit ir a tsayt gelebt in Berlin un shpeter in Pariz.
s'hot azoy pasirt, az ven dr. Gombiner iz avek keyn Amerike, iz Nela geforn oyf a bazukh tsu tate-mame in Varshe.
er hot zi gezolt aropbrengen keyn Amerike nokhdem vi er vet do gefinen an iberzetser, a farlag, *efsher a profesor-shtele in eynem fun di groyse Amerikaner universitetn.
in yener tsayt iz dr. Gombiner nokh geven bay zikh hoferdik.
m'hot im forgeshlogn a katedre in dem hebreishn universitet in Yerusholayim.
a Palestiner farlag hot gezolt drukn zayns a bukh.
m'hot farefntlekht zayne eseyen in Tsurikh, in Pariz.
ober mitn oysbrukh fun der *Hitler-milkhome, hot alts genumen im geyn *shlim-mazldik.
er hot zikh gehat farbundn mit a literarishn agent, ober yener iz plutsling geshtorbn.
dr. Gombiner hot gefunen an iberzetser, ober di iberzetsung hot nisht getoygt.
*efsher iz dos veynik, iz der iberzetser gehat farshvundn, mitgenumen dem manuskript.
dr. Gombiner hot nisht gehat keyn kopye.
in der yidisher prese zenen di shrayber epes vi on *sibe gevorn tsu im fayntlekh, gegebn ontsuhern, az er iz a sharlatan.
di yidishe organizatsyes vos hobn bashtelt bay im forlezungen, hobn zey tsurikgerufn.
loyt zayn eygener filozofye zenen ale laydn geven nisht mer vi oysdrukn fun der universaler erotik.
Hitler, Stalin, di natsis vos hobn gezungen dos Horst Vesl-lid, un ongeton yidn gele lates, hobn faktish gezukht naye formen un variatsyes fun baheftung.
ober dr. Gombiner hot bakumen *sfeykes in zayn eygenem sistem.
er iz gehat arayngefaln in a fartsveyflung.
er hot zikh gemuzt aroystsien fun dem hotel vu er hot gevoynt un gefinen a meblirt tsimer.
er iz arumgegangen in farvorlozte *malbushim, opgezesn gantse teg in kafeteryes, getrunken umtsolike teplekh kave, geroykhert shlekhte tsigarn, zikh oysgehaltn fun a por tsendlik dolar, vos s'hot im oysgetsolt yedn *khoydesh a filantropishe gezelshaft.
*pleytim hobn farshpreyt alerley nayesn vegn vizes, peklekh, mitlen aribertsubrengen *kroyvim fun natsi-okupirtn Poyln keyn Honduras, Kuba, Brazil, ober er, *Zorekh Gombiner, hot keynem nisht gekont aroyskrign fun di natsishe getos.
fun Lenan iz ongekumen an eyntsiker briv un mer hot er fun ir nisht gehert.
ersht do, in Nyu-York, hot dr. Gombiner banumen vi tsugebundn er iz geven tsu der doziker Lenan.
on ir iz er gevorn umbaholfn.

  2

alts hot zikh *ibergekhazert vi nekhtn, vi eyernekhtn.
Bhagavar Krishna hot genumen redn fun der mrs. Kopitskis moyl oyf english mit a halb-vayberish, halb mansbilsh *kol in a shvern aktsent, mit der mrs. Kopitskis grayzn in der oysshprakh un in der gramatik.
Lote, oder *Leye Kopitski hot geshtamt fun a shtetl ergets in di karpatn.
dr. Gombiner hot keyn mol nisht gekont dergeyn vos zi iz: an ungarishe, a rumenishe, a galitsyanerin.
zi hot nisht gekont nisht keyn poylish, nisht keyn daytsh, nisht keyn english, un der yidish irer iz oykh gevorn fardorbn in di lange yorn in Amerike.
zi hot faktish nisht gekont keyn *shum shprakh, un Bhagavar Krishna, der *khokhem fun Indye, hot zikh banutst mit ir koydervelsh.
di ershte tsaytn hot dr. Gombiner gepruvt fregn bay Bhagavar Krishna eyntslhaytn fun zayn erdisher ekzistents, ober Bhagavar Krishna hot geentfert, az er hot shoyn alts fargesn in di sfern, vu er gefint zikh.
er zol hobn gevoynt ergets in a forshtot fun Madras.
Bhagavar Krishna hot *afile nisht gevust, az in yenem teyl Indye redt men tamil.
dr. Gombiner hot mit im gepruvt farfirn a *shmues vegn sanskrit, der Mahabarata, der Ramayana, der Sakuntala, ober Bhagavar Krishna hot *getaynet, az er iz mer nisht bahavnt in der erdisher literatur.
der indisher *khokhem hot gornisht gekont a *khuts di por teozofishe un spiritistishe bikhlekh un zhurnaln vos di mrs. Kopitski hot ibergeleyent.
s'iz alts geven far dr. Gombiner eyn groyser vits, ober az m'valgert zikh in a tsimer mit vantsn, m'hot a fardorbenem mogn fun esn in kafeteryes un m'blaybt tsu fir un zekhtsik yor on a familye, - krigt men geduld tsu alerley shlek.
emets hot im gehat bakent mit der mrs. Kopitski nokh in 1942.
er iz zint demolt gezesn bay tsendliker seansn ire, geleyent ire oytomatishe shraybekhtser, batrakht ire oytomatishe molerayen, gehert ire oytomatishe kontsertn, zikh *durkhgeshmuest mit di toyte vos zi hot aroysgerufn.
hipshe etlekhe mol hot er genumen bay ir a *halvoe, vos er hot nisht opgegebn. er hot oft gekrogn bay ir a vegetarishn saper, vayl di mrs. Kopitski hot nisht gegesn keyn fleysh, keyn fish, keyn milkh, keyn eyer, bloyz shpayz vos di mame erd hot aroysgegebn: grinsn un frukhtn.
zi hot im tsugegreyt salatn mit nis, mandlen, milgroymen, avokado.
in onhoyb hot Lote Kopitski gepruvt farfirn mit dr. *Zorekh Gombiner a libe.
di gayster hobn ale gehaltn, az Lote Kopitski un *Zorekh Gombiner darfn zikh fareynikn in getlekher libshaft.
Bhagavar Krishna hot aroysgevizn a neygung tsu *shadkhones.
Lote Kopitski hot *keseyder opgegebn dr. Gombinern grusn fun di himlishe maysters vos zenen farbundn mit Tibet, Atlantis, der himlisher hershaft, der Shamballa, dem fertn kenigraykh fun der natur un mit dem rat fun SanatKumara.
in himl, vi oyf der erd, zenen in di ershte fertsiker yorn antshtanen alerley krizisn.
*koykhes hobn zikh ibergrupirt.
di mitglider fun di ashrams hobn zikh gegreyt tsu a *milkhome mit di kosmishe beyze *koykhes.
m'hot fun di oybershte sfern aroysgeshikt prozhektorn, vos zoln balaykhtn dem planet erd un oysteyln geklibene mener un froyen far spetsyele tsvekn.
di mrs. Kopitski hot farzikhert, az er, *Zorekh Gombiner, iz ongebreyt tsu shpiln a rizike rol in universaln vidergeburt.
ober er hot farvorlozt zayn misye, antoysht di getlekhe maysters.
er hot gezolt telefonirn der mrs. Kopitski, ober er hot nisht telefonirt.
er iz gehat avekgeforn oyf etlekhe *khadoshim keyn Filadelfye, *afile nisht geshribn keyn postkartl.
er iz tsurikgekumen un nisht tsu visn geton, az er iz do.
di mrs. Kopitski hot im gehat getrofn in an oytomat oyf der zekster evenyu - an opgerisenem, in a koytik hemd, in oysgedreyte shikh.
er hot *afile nisht gehat ongegebn oyf keyn birgershaft, khotsh loytn gezets hobn ale *pleytim gekont vern birger, nisht gedarft aroysforn keyn oysland tsu krign di vize.
itst in 1946, hot zikh gehat aroysgevizn, az alts vos Lote Kopitski hot im foroysgezogt mit yorn frier, iz gevorn vor.
ale zayne noente zenen gehat ariber oyf yener zayt: der tate, di brider, di shvester, Lena.
Bhagavar Krishna hot fun zey alemen opgegebn grusn.
s'hot oysgezen, az di maysters hobn nokh alts gehat gedenkt dr. Gombiner un nokh alts gehat far im plener.
*afile dos umkumen fun der familye zayner in Treblinke, Maydanek, Shtuthof, iz eng farbundn mit di *koykhes fun likht, mit der antviklung fun der karma, mit der *tkufe fun lemurya un mit dem farmest tsu derfirn di mentshhayt tsu a frishn oyfshtayg in libe...
di letste por vokhn hot di mrs. Kopitski zikh nisht bagnugnt mit aroysrufn Lenas gayst oyfn geveynlekhn shteyger.
zi hot gegebn dr. Gombiner di zeltene gelegnhayt tsu *shmuesn mit der umgekumener Lenan vi mit a lebediker.
s'iz forgekumen azoy: in a gevisn moment hot der Bhagavar Krishna gegebn a tseykhn un er, *Zorekh Gombiner, hot zikh gelozt geyn ibern fintstern koridor tsum shloftsimer.
dort, in der fintsternish, nebn der mrs. Kopitskis komode, hot gehoyert a geshtalt vos hot gezolt zayn Lena.
zi hot geflistert tsu dr. Gombiner oyf poylish, im ayngeroymt tsertlekhe verter, im opgegebn grusn fun fraynd, *kroyvim.
Bhagavar Krishna hot gehat shtreng farbotn dr. Gombiner nisht tsu pruvn onrirn dem gayst, vayl dos kon brengen shodn say im, dr. Gombiner, say der mrs. Kopitski.
di getseylte mol, vos dr. Gombiner hot gemakht a farzukh zikh tsu ir tsu derneentern, hot zi zikh kuntsik avekgeglitsht.
nu, ober vi tsetumlt un dershrokn dr. Gombiner iz nisht geven bay di dozike stsenes, hot er fun destvegn zikh opgegebn a *kheshbn, az s'iz alts shvindl.
di froy vos hot zikh tsu im bavizn iz nisht Lena, s'iz nisht ir shtim, nisht ir stil.
di grusn vos zi hot im ibegegebn hot men laykht gekont oystrakhtn.
er hot gehat dermont di ale nemen tsu der mrs. Kopitski un zi hot im demolt oysgefregt eyntslhaytn.
eyn gefil iz yo geblibn bay dr. Gombiner: a nayger.
vos iz dos far a moyd vos bavayzt zikh tsu im?
un tsulib vos tut zi dos?
*mistome far gelt.
di mrs. Kopitski hot *avade ir batsolt.
ober dos dingen a gayst hot bavizn, az Lote Kopitski iz kapabl nisht bloyz oyf zelbstopnareray, nor oykh optsunarn andere.
yedes mol, vos dr. Gombiner hot zikh gelozt shpanen iber dem fintstern koridor, vos hot gefirt tsu Lote Kopitskis shloftsimer, hot er gemurmlt:
- *meshuge... *meturef... a vilde parshoynte... fe!...
haynt bay nakht hot dr. Gombiner koym zikh gekont dervartn oyf Bhagavar Krishnas signal.
di gantse avanture iz gehat gevorn tsugegesn.
er hot shoyn a tsayt gelitn oyf der prostate un yede halbe *sho gedarft *mashtn zayn.
geveynlekh flegt er baym araynkumen fun droysn optretn in bodtsimer, ober dos mol hot er fargesn.
s'hot im itst geshtokhn in der bloz.
fun di roye grinsn, vos di mrs. Kopitski hot im gegebn tsu esn oyf nakhtmol, hot im gegrimt in di gederem.
nu, kh'bin tsu alt *afile far azoyne fargenigns, hot er gesheptshet, oder getrakht.
der *khokhem fun Indye hot geredt, ober dr. Gombiner hot zikh rekht nisht tsugehert.
vos ploydert zi, di idyotke?
vemen nart zi op?
zi kon *afile nisht zayn keyn laytishe boykhrederin...
Bhagavar Krishna hot itst gegebn dem tseykhn un dr. Gombiner hot zikh oyfgeshtelt.
er hot shoyn gelitn oyf di fis zint yorn, ober zey zenen im nokh keyn mol nisht geven azoy shver un shlaberik vi hayntikn ovnt.
nu, kh'vel muzn frier arayn in bodtsimer! - hot er bashlosn.
a varshever doktor vos tor nisht praktitsirn in Amerike un nemt on patsyentn shtilerheyt, hot gehat *ayngetaynet mit dr. Gombiner, az er tor nisht opleygn di operatsye, s'konen zikh nokh shafn komplikatsyes.
ober nisht er hot gehat gelt tsu geyn in shpitol, nisht dem viln.
er hot zikh aleyn geheylt mit heyse beder, mit varemflashn, mit a pil vos er hot nokh mitgebrakht fun Frankraykh.
er hot *afile gepruvt zikh aleyn masazhirn.
kh'toyg shoyn far eyn zakh: far shmelts, hot er geklert.
dem veg tsum shloftsimer hot er gedenkt, ober tsum bodtsimer iz vaytlekh.
dr. Gombiner hot zikh gerukt a vakldiker, getapt mit di hent foroys, vi a blinder.
er iz gehat tsugekumen tsum bodtsimer, gepruvt efenen di tir, ober emets hot a shlep geton di klyamke oyf tsurik.
s'iz zi, di moyd! - hot dr. Gombiner tsu zikh geredt.
er iz gevorn azoy farblift, az er hot fargesn on zayn baderfenish.
Nelas "gayst" iz *a ponim gehat arayn in bodtsimer zikh iberton.
a *bushe hot im ongenumen far zikh aleyn, far der gefalnkayt fun der mrs. Kopitski.
tsu vos toyg es ir?
mit vemen shpilt zi a komedye?
di oygn zayne hobn zikh shoyn gehat tsugevoynt tsu der fintsternish un er hot untergesheydt durkh der shoybntir yeners figur.
dos bodtsimer hot gehat a fentster tsu der gas un s'iz arayngefaln der opshayn fun a lamter.
zi hot zikh opgetseykhnt a niderike, a breytlekhe, mit aroysshtartsndike hiftn un a hoykhn buzem.
zi iz, zet oys, geshtanen in di untervesh.
dr. Gombiner iz geblibn a geplefter.
er hot gevolt a ruf ton: genug, der shvindl iz klor!
ober di tsung iz im gevorn opgenumen.
dos harts hot im gezetst un er hot gehert dos shnorkhenish fun zayn eygener noz.
nokh a vayl hot er zikh gelozt tsurikgeyn, ober vi nor er hot zikh oysgedreyt, hot er zikh ongeshtoysn on a henger fun *malbushim.
er hot ongetapt a vant, bakumen a klap in kop.
er iz opgetretn oyf tsurik un epes iz aropgefaln un zikh tsebrokhn, - *a ponim eyne fun der mrs. Kopitskis yene-veltishe shmokhtes...
in der *rege hot der telefon in koridor zikh tseklungen - zikh opgerisn oysterlish sharf un alarmirndik.
dr. Gombiner hot geton a tsiter.
er hot plutsling dershpirt a varemkayt in di untervesh.
er hot zikh banetst vi a kind...

  3

- nu, kh'halt shoyn baym same *sof - hot dr. Gombiner tsu zikh geredt.
er hot zikh gelozt krikhn oyf tsurik.
nisht bloyz di untervesh, di hoyzn zenen im oykh faykht.
er hot zikh gerikht, az di mrs. Kopitski vet im akegnkumen.
s'hot nisht eyn mol getrofn, az zi hot zikh ibergevekt in mitn a trans un iz avek *shmuesn oyfn telefon fun aktsyes, vertpapirn, riel-esteyt.
ober der telefon hot geklungen un keyner iz nisht gegangen entfern.

dr. Gombiner hot ersht itst banumen vos er hot opgeton:
er hot gehat tsugemakht di tir vos hot gefirt tsu der mrs. Kopitskis salon un farshtelt di royte shayn, vos hot im geveynlekh gevizn dem veg tsurik.
ikh'l gor geyn aheym, hot er bashlosn.
er hot zikh gelozt tsu der droysntir, ober er hot farloyrn yede oryentatsye in dem dozikn fanandergevorfenem apartment.
er iz fun destvegn tsugekumen tsu a tir, geton a tsi un di tir hot zikh oyfgepralt.
emets hot aroysgelozt a farshtiktn geshrey.
er iz vider gehat derkrokhn tsum bodtsimer.
m'hot *a ponim, fun ineveynik nisht gekont farmakhn oyf keyn shlos oder a keytl.

er hot derblikt a froy in a gorset, on a kleyd, dos *ponim halb-baloykhtn.
in dem brukhteyl fun a *rege vos er iz do geshtanen, iz im gevorn klor, az dos iz a mitlyerike froy.
er hot a murml geton:
- zayt *moykhl...
der telefon hot shoyn gehat oyfgehert klingen, ober er hot glaykh fun s'nay zikh tseklungen.
mit a mol hot dr. Gombiner derzen di royte shayn.
di mrs. Kopitski iz gegangen entfern dem telefon.
er hot zikh opgeshtelt un halb gefregt halb gezogt:

- mrs. Kopitski!
di mrs. Kopitski hot geton a tsapl.
- shoyn geendikt?
- kh'bin nisht gezunt. kh'muz aheym geyn? - hot dr. Gombiner geshtamlt.
- nisht gezunt? vu vilt ir geyn?
vos iz aykh?
dos harts?
- alts mit a mol.
- vart a sekunde!

di mrs. Kopitski hot zikh tsu im dernentert.
zi hot im ongenumen baym orem, tsurikgefirt in salon.
der telefon hot geklungen a vayl.
dernokh iz er gevorn antshvign.
di mrs. Kopitski hot a zog geton:
- s'hot aykh tsugedrikt baym harts, ha?
leygt zikh tsu oyf der sofe.
ikh'l glaykh rufn a doktor.
- neyn, neyn, m'darf nisht.
- ikh'l aykh makhn a masazh -
- bay mir iz di bloz nisht in ordenung.
mayn prostate -
- ha? ikh'l makhn likhtik.

er hot gevolt betn di mrs. Kopitski zi zol es nisht ton, ober s'iz shoyn geven tsu shpet.
zi hot ongetsundn etlekhe lompn mit a mol.
s'hot im a blend geton in di oygn.
zi iz geshtanen bay der vant un gegaft oyf im un oyf zayne nase hoyzn.
der kop irer hot zikh tsiterndik geshoklt: do oyf yo, do oyf neyn.
zi hot a zog geton:

- dos kumt aroys fun lebn aleyn.
- *beemes, s'iz mir a *kharpe.
- vos iz di *kharpe?
ale vern elter, keyner vert nisht yinger.
ir zent arayn in bodtsimer?
dr. Gombiner hot nisht geentfert.
- vart a minut.
s'zenen geblibn fun im *malbushim.
kh'hob ergets-vu gevust, az kh'vel zey a mol darfn...
di mrs. Kopitski iz avek.
dr. Gombiner hot zikh badekhtik tsugezetst oyf a breg shtul.
er hot zikh untergeleygt a noztikhl.
er iz gezesn a shtayfer, a naser, kindish-shuldik, mit yener ineveynikster shtilkayt, vos kumt mit shlafkayt.
er hot yorn-lang getsitert far doktoyrim, shpitol, barmhartsike shvester, vos tuen oys fun zikh di vayberishe *bushe un bahandlen manslayt vi kinder.
itster iz er geven greyt tsu di letste farshemungen fun *guf.
nu, kh'bin kaput.
s'iz gekumen der *sof.

emets in im hot gemakht a *kheshbn-hanefesh.
filozofye? voser filozofye?
erotik? vemens erotik?
er hot zikh gehat gegriblt fertsik yor in verter.
er iz nisht gehat gekumen tsu keyn shlus.
neyn, dos vos es hot zikh geton mit im, arum im, in Poyln, in Rusland, oyf di planetn, in gantsn univerz, iz nisht blinder viln un nisht erotik;
nisht Shpinozas substants, nisht Laybnitss monadn;
nisht Hegels dyalektik, nisht Hekels monizm.
oyb s'iz *afile faran aza zakh vi dozayn, iz iber hoypt nishto derfar keyn bagrif in mentshlekhn *moyekh.
s'iz nokh gut, vos kh'hob nisht opgedrukt mayne patshkerayen, hot emets in im geredt.
tsu vos di ale nisht-geshtoygene hipotezn?
zey helfn gornisht...

er hot gekukt oyf der mrs. Kopitskis bilder.
in der greler shayn hobn zey dermont on di shmirerayen fun shulkinder. fun droysn, fun yener zayt fentster, hobn zikh durkhgerisn griltsenishn fun oytomobiln, geshreyen fun yungen, *afile der dunerndiker ophilkh fun der sobvey.

di tir hot zikh geefnt un di mrs. Kopitski hot getrogn a pak *malbushim - a rekl, hoyzn, vesh.
s'hot a shmek geton mit naftalin, shtoyb un mit nokh epes, vos iz shoyn lang avek, a reshtl fargangene tsayt, vos iz gelegn ayngepakt un prezervirt ergets in a shrank, oder a kufert.
di mrs. Kopitski hot a zog geton:
- ir zent frier nisht arayn in shloftsimer?
- ha? neyn.
- Lena hot zikh tsu aykh nisht antplekt?
- neyn, nisht antplekt.
- nu, tut zikh iber.
far mir darft ir zikh nisht hitn.
zi hot avekgeleygt di *malbushim oyf der sofe.
zi hot zikh geboygn iber im mit der getrayshaft fun a *kroyve, mit dem badoyern fun a fremder.
zi hot a zog geton:
- ir't shoyn blaybn do.
ikh'l morgn shikn nokh ayere zakhn.
- neyn, s'hot nisht keyn zin.
- kh'hob gevust, az s'vet kumen dertsu, glaykh vi mir hobn zikh bakent yene nakht oyf sekond evenyu.
- vi azoy? nu, alts eyns.
- m'zogt mir zakhn foroys.
kh'tu a kuk oyf emetsn un veys vos s'vet zayn mit im.
- azoy? ven gey ikh a gang?
- ir't nokh lebn hipshe yorn.
m'darf aykh do.
ir muzt nokh farendikn ayere verk.
- mayne verk hobn aza vert vi ayere gayster.
- s'zenen do gayster, zayt nisht azoy tsinish!
m'kukt arop tsu undz fun der hoykh.
m'firt undz bay di hent.
m'mest undzere trit.
mir zenen a *sakh vikhtiker in kosmos vi aykh dukht zikh.
er hot zi gevolt fregn: oyb azoy, tsu vos darft ir dingen a moyd zi zol mikh opnarn?
ober er hot geshvign.
di mrs. Kopitski iz aroys in koridor.
dr. Gombiner hot oysgeton di hoyzn, di untervesh.
er hot zikh opgevisht mitn tikhl.
a vayl iz er geshtanen oybn ongeton un untn naket, vi a payats.
dernokh iz er arayn in a por loyze gatkes, kile vi *takhrikhim.
er hot aroyfgetsoygn oyf zikh a por geshtrayfte hoyzn, vos zenen geven tsu breyt un tsu lang far zayn vuks.
er hot gemuzt aroyfshartsn di manketn biz tsu di kni.
er hot gesopet, geshnorkht, yede por sekundn zikh avekgeshtelt opruen.
epes hot zikh im dermont.
azoy flegt er yinglvayz onmestn dem tatns *malbushim, ven der tate hot zikh geleygt shlofn *shabes nokhn tsholnt: di pludern, di atlesene zhupitse, dem *tales-kotn.
itst iz der tate a hayfl ash ergets in Poyln un er, *Zorekh, iz arayngekrokhn in di kleyder fun a geshtorbenem dentist.
dr. Gombiner hot zikh dernentert tsum shpigl, zikh ongekukt.
er hot *afile *mayse-yingl zikh aleyn gevizn a shpits tsung.
dernokh hot er zikh tsugeleygt oyf der sofe.
der telefon in koridor hot vider geklungen un di mrs. Kopitski hot, *a ponim, geentfert, vayl der roysh hot bald oyfgehert.
dr. Gombiner hot tsugemakht di oygn, iz gelegn shtil, mit der ru fun *yiesh.
er hot mer gornisht gehat oyf vos tsu hofn.
s'iz *afile nisht geblibn fun vos tsu trakhtn.
er hot ayngedrimlt un er hot zikh gefunen in der kafeterye oyf der 42ster gas, nebn der shtot-biblyotek.
er hot gebrokhn shtiklekh fun an eyer-kikhl.
epes a *polet hot dertseylt vegn a mitl aroystsurateven yidn fun Poyln.
men tut zey iber in natsishe mundirn.
m'firt zey iber shifn durkhn nordpol, dem zidpol, ibern Patsifik.
agentn nemen iber di *pleytim in Fayerland, Honolulu, Yokohama...
vi oysterlish, nor der doziker shmugl hot gehat tsu ton mit zayn, dr. Gombiners, filozofishn sistem, nisht mit dem frierdikn *nusekh, nor mit a nayer versye, vos hot tsunoyfgegosn erotik mit *zikorn.
dr. Gombiner hot zikh *gekhidesht.
vos iz di *smikhes-haparshes?
s'iz a *pshetl, a *pshetl.
dos pruvt er farentfern zayn eygene umbaholfnkayt.
nu, un vi azoy kon men rateven Lenan, ven zi iz umgekumen?
saydn der toyt aleyn iz nisht mer vi a seksuele amnezye...
er hot zikh ibergevekt un di mrs. Kopitski hot zikh geboygn iber im.
zi hot gehaltn a kishn, greyt im untertsuleygn tsukopns.
- vi filt ir zikh, ha?
- Lena iz shoyn avek? - hot er gefregt, dershtoynt fun di eygene verter.
er iz, *a ponim, nokh geblibn halb-farshlofn.
di mrs. Kopitski hot zikh farkrimt.
der toplkin irer hot zikh genumen shoklen, tsitern.
di aroysgebalte oygn zenen gevorn ful mit muterlekhn forvurf.
- ir lakht, ha?
s'iz nisht do keyn toyt, s'iz nishto.
mir lebn eybik un mir libn eybik.
dos iz di reyne vorhayt...