der poyer vos hot gezen got

griner akvaryum 7: Der poyer vos hot gezen got

In a halbn krayz, vi an ongeshpanter boygn, shteyen arum kanave di shiser mit farkasherte arbl un tsiln in "redele fun *mazl" - in a kupe *farmishpete.
Der opshayn fun a meshenem shayter in derbayikn veldl, mit beymer fun halb tsefalene skeletn, bashimert mit brenendike shotns dos gebeyn fun lebedike toyte, vos ale zeen zey oys vi eyner - azoy zet oys erd, ven an aker tseshnaydt un kert zi iber.
Bloyz di bobe, mit beyde eyniklekh bay di zaytn - a grayz-groe odlerin mit tseshpreyte fligl, bloyz zi halt oyf di eybikayt fun ir *ponim.
Di bobe iz farblibn fun di letste. Beyde eyniklekh kushn ire hent mit *farkhaleshte lipn:
- Bobe, nakhsol faln do azoy fil mentshn?
Di bobe farheybt dem kop. S'iz blo un loyter. Eyn rizike *levone. Fun der bobes oygnkvelkhl shvimt aroys a trer vos zi hot oysbahaltn lange yorn. Di trer shvimt, rizlt un farfleytst di *levone.
s'nemt volkenen, regenen, mit vareme bobishe trern. Zey, di trern, farleshn dem shayter, filn on di kanave.
Bobe farmakht di oygn un blinderhayt azoy khapt zi eyn eynikl - un lozt zikh loyfn.
vemen geratevet - *khanelen tsi Mirelen? Me tor nit klern. S'kind shloft un di bobe sheptshet:
- *khane-Mirele, *khane-Mirele...
zi blondzhet in der tseveykter fintsternish. oyf di akslen shloft *khane-Mirele.
Bobe kumt in a dorf. Hintern shoyb fun a khate tsaplt a fayerl.
Bobe toptshet in vaser. Falt, heybt zikh oyf, un klapt on in khate vi in harts fun a *malekh.
- Kto?
- Guter mentsh, loz arayn...
s'efnt zikh pavolye di tir, un a poyer, halb naket, mit a lempele in eyn hant un a baytsh in der anderer, bavayzt zikh oyfn ganik.
Un er farheybt di baytsh iber der *zkeyne.
Nor demolt shlogt aroys a *kol, vi a vayser fligl, fun der altitshkes lipn:
- Mentsh, vos tustu, bistu blind, zestu nit az in regn iz got?
Di lange baytsh in hant fun poyer, farmostn oyf der boben, derlangt im a bis vi a shlang. Er kon di hant nit heybn, er kon zi nit aroplozn.
In shayn funem lempele zet er:
An altitshke mit lange, vayse hor vi bagosn mit kalkh. Di vies bahangen mit kleyne tropns - banodlte kishelekh. Oyf di akslen trogt zi a kind - a blo shepsele. Un hinter der boben, tsvishn federn regn, batsoygene mit tsapldike perl, shvebt arum a geshtalt un tsit oys tsum poyer a langn blitsikn finger.
Di kni beygn zikh. Dos lempl falt aroys fun hant. Un dos bloe shepsele, arum haldz, vakht oyf:
- Bobe!

[8]  Dos ringele
tsurik griner akvaryum